Kuvendi i Shqipërisë është mbledhur në seancën e pasdites ku aktualisht ka nisur proçesi i votimit për zgjedhjen e Gramoz Ruçit në postin e kryeparlamentarit.
Përpara nisjes së votimit u ngrit edhe komisioni për numërimin e votave, ku PD nuk paraqiti asnjë propozim, ndërsa në përbërje të tij janë deputetë socialistë dhe nga LSI.
Fillimisht deputetja Vasilika Hysi ka lexuar raportuan e Komisionit të Verifikimit të Mandateve, ndërsa drejtuesi i seancës Besnik Bare ka lexuar formulën e betimit, duke thirrur të gjithë deputetët në emër për të bërë betimin.
Të 140 deputetët me radhë kanë shqiptuar fjalën ‘Betohem’, duke u bërë kështu zyrtarisht deputetët.
Ndërkohë para Kuvendit po zhvillohet prej disa minutash protesta e disa dhjetra qytetarëve që kërkojnë bllokimin e votimit të Ruçit në postin e kryetarit të Parlamentit. Protestuesit kanë bërë thirrje që deputetët e PD dhe LSI të bllokojnë proçedurat, pasi kanë detyrimin moral për të penguar që në postin nr 2 të shtetit të vendoset një individ me lidhje me sistemin diktatorial.
Mandatet sipas forcave politike
PS 74 mandate
PD 43 mandate
LSI 19 mandate
PDIU 3 mandate
PSD 1 mandat /tesheshi.com/
