Ilir Meta do të betohet sot si presidenti i ri i Republikës në një ceremoni që nis në Sallën e Kuvendit, vijon në Presidencë dhe përfundon me një intervistë të tij në darkë në Top-Story.
Meta që prej ditës së zgjedhjeve 25 qershor nuk ka bërë asnjë dalje publike si për të “harruar” shijen e hidhur që la gjatë fushatës ku u angazhua hapur për partinë e tij LSI-në edhe pse ishte zgjedhur president.
Nuk dihet se sa deputetë do të jenë pjesëmarrës në këtë ceremoni, nëse do të jenë deputetët e opozitës apo jo, pasi opozita nuk e ka votuar Metën në Prill pasi ishte në bojkot të Kuvendit.
Edhe socialistët që e votuan kanë shfaqur pakënaqësi për mënyrën se si Meta u soll gjatë fushatës, e cila ishte një fushatë e egër mes PS-së dhe LSI-së.
Kur na ndajnë dhe pak orë nga ceremonia që do të kurorëzojë Metën si kreun e ri të Republikës janë mësuar disa detaje interesante.
Bashkia e Tiranës është angazhuar në sistemimin e sheshit përpara Kuvendit, si dhe rrugën e cila ishte me pllaka të dëmtuara.
Përveç rikonstruksionit të rrugës do të ketë dhe një gjelbërim të theksuar sot në hyrje të Kuvendit dhe brenda në sallë duke i dhënë atmosferën e një feste, e cila do të nisë në orën 18.00.
Pas betimit Meta do të shkojë në zyrën e tij të re në Presidencë, ku do të pritet nga presidenti në ikje Bujar Nishani dhe do të organizohet një tjetër ceremoni me të ftuar VIP dhe trupi diplomatik në Tiranë.
Meta ka vendosur të “thyejë” protokollin dhe të marrë si shoqëruese jo bashkëshorten, por vjazëne tij të madhe, Borën, e cila mesa duket do të luajë rolin e zonjës së parë.
Gruaja e tij Monika Kryemadhi, nuk e ka pranuar këtë rol për shkak të angazhimit të saj politik si kryetare e LSI-së dhe si deputete.
Meta pritet të mbajë fjalimin e parë si president, i cili do të ndiqet nga detajet protokollare si parakalimi i Gardës dhe të shtënat e topave.
Në darkë ai do të jetë në emisionin Top-story, njofton TCH. /tesheshi.com/
