Në Shkup ka shpërthyer një betejë mes shqiponjës dhe kryqit, një precedent i pazakontë ky. Është fjala për një kundërpërgjigje maqedonase ndaj shqiponjës shqiptare në formë obelisku vendosur në lagjen e njohur Çair. Dhe është komuna e Butelit në Shkup ajo që ka vendosur ngritjen e një kryqi 55 metra të lartë në hyrje të saj, pra gati një javë pas inagurimit të shqiponjës në komunën e Çairit.
Ky kryq do të vendoset në rrethrrotullimin në hyrje të komunës, por kjo mund të shkaktojë reagime të popullatës, e cila 80% i përket religjionit islam.
Dhe tanimë është bërë praktikë e zakonshme, që kur një figurë emblematike shqiptare të vendoset në vendbanimet shqiptare, vijojnë 10 figura tjera si kundërpërgjigje nga maqedonasit.
Por ky rast është unikal, pasi deri më tani është trajtuar minareja e xhamisë si ekuivalent i kryqit e jo shqiponja. Por ky është Ballkani, ku bëhen lëmsh, ose nganjherë shkrihen me koshiencë me njëra-tjetrën, simbolet fetare me ato kombëtare.
Nga ana tjetër, vetë qendra e Shkupit është shndërruar në qesharake me një aradhë monumentesh antike, duke krijuar imazhin virtual të një të kaluare që vërtet mund të ketë ekzistuar, por që nuk ka lidhje me shtetin e sotëm maqedon, aq më pak me Gruevskin, ideatorin e tyre. /tesheshi.com/
