Një shtim të forcave policore në Gjirokastër, të përligjura me operacionin për kapjen e shumëtëkërkuarit Klemend Balili, drejtuesi i LSI-së së zonës, deputeti i saj Vangjel Tavo, e ka marrë si një sulm ndaj minoritetit, siç tha ai për të dëmtuar aty procesin zgjedhor.
Ankesat e tij ndaj policisë, ku në fakt nënkuptohet sulmi në front i LSI-së ndaj ministrit Tahiri, kanë nisur me mbështetjen ndaj kolegut Koka për ato çka tha në natë më parë, ku u dha e kuptuar se aleanca PS-LSI pothuajse nuk ekziston më.
“Kuptohet shqetësimi i ministrit Koka dhe nga ana tjetër shqetësimi i një lideri të LSI, pasi është një ndër themeluesit e kësaj force politike. Në fakt konstatoj edhe unë në Gjirokastër një tentativë, përpjekje nga ana e policisë së shtetit për të ndikuar në procesin zgjedhor. Nuk e kam bërë publik sepse t’u them të drejtën asnjëherë nuk kam menduar që këto përpjekje të drejtuesve të policisë së Qarkut Gjirokastër janë të lidhura me PS direkt, dhe kurrë nuk mund ta besoj. Në momentin që do të kem një konfirmim të një fakti të tillë atëherë pa dyshim që dhe unë do ta bëj jo thjesht publike, po do ta quaja alarmante këtë situatë. Do i kërkoja sinqerisht si pjesë e këtij koalicioni ndërhyrjen e ministrit Tahiri tek drejtuesit e Policisë së Shtetit të mos merren me politikë sepse nuk është prioritet i policisë së shtetit”, është shprehur Tavo.
Ky i fundit është një ish-deputet i PS-së që iu shkëput kësaj partie në 2012-ën, pas përplasjeve me strukturat lokale. Tavo njihet si kapoja politik i Dropullit, zonës minoritare të jugut, ku ka çelur dhe një degë LSI brenda minoritetit. /tesheshi.com/
