Beteja për “Velierën”, Vetingu bllokon procesin gjyqësor të projektit

Nuk kanë të sosur debatet dhe akuzat për projektin më të shumëpërfolur në Durrës, “Veliera”.

Prej disa kohën ky projekt në zemër të qytetit bregdetar ndodhet në  proces gjyqësor; ndërsa prej gati një muaji punimet janë pezulluar, pasi nuk plotësohet numri tre i gjyqtarëve të administratives që nevojiten për të gjykuar çështjen.

Shoqëria civile e kryesuar nga Sazan Guri, që në fillimet e projektit ka qenë zëri i vetëm kundër ndërtimit të saj. Por, ajo që mbetet mister është se pse është bllokuar procesi.

Avokatja e çështjes nga shoqëria civile, Mirela Jorgo sqaron se shkak për bllokimin është bërë vetingu, i cili ka nxjerrë jashtë loje KLD-në.

Kjo e fundit e ka në tagrin e saj caktimin e një gjyqtari, në mënyrë që të plotësohet nr. 3 i tyre për të kryer gjykimin e çështjes.

Një situatë e tillë u krijua  pas dorëheqjes së gjyqtares Marjana Velçani nga kjo çështje.
Punimet, sipas avokates ato janë shtrirë edhe në zonën A arkeologjike në kundërshtim me ligjin.
“Më shqetëson fakti, që edhe pse ka tre vendime gjykate për masë pezullimi dhe pjesës së sekuestros preventive për zonën A, aty po punohet me ritme të shpejta, është çarë muri antik nga një tubacion betoni, është hequr shiriti i verdhë i prokurorisë dhe është vendosur një tabelë e madhe ‘Kantier ndërtimi’. Kemi mbledhur provat, kemi bërë një video dhe kemi bërë një kallëzim tjetër në prokurori dhe shpresoj të ketë hetime”, u shpreh ajo.

Ndërsa projekti “Veliera” po shkon drejt mbylljes, Agjencia e Shërbimit Arkeologjik ende nuk e ka dhënë verdiktin final nëse do të devijohet projekti, apo nuk do të merren parasysh rrënojat arkeologjike që u zbuluan gjatë gërmimeve.

Megjithëse kjo agjenci është njohur me problemin që në muajin janar, ajo po e zvarrit përgjigjen, sepse rezultatet e arkeologëve janë bërë publike disa muaj më parë, sqaron avokatja e çështjes. /tesheshi.com/