Kreu i Bashkisë së Tiranës Erion Veliaj, përcolli një tjetër mesazh bindjeje se Teatri i Ri do të ndërtohet pavarësisht rezistencës stoike të së ashtuquajtures “Aleanca për Teatrit”, e ngujuar aty prej kohësh, ku individë të saj qëndrojë “roje” për mosshembjen.
“Jam shumë i vendosur të vazhdojmë me Teatrin e Ri. Për të gjithë ata që thonë kur do prishet, kjo nuk është sipas qejfit, por sapo të kenë mbaruar të gjitha procedurat, sapo të shkojë në Parlament kontrata e re, të jepet leja për Teatrin e ri dhe ne do të kemi teatrin më të bukur në të gjithë Europën Juglindore. Tirana e meriton që në 100 vitet te ardhshme të mos shkojë në teatër me batanije dhe qytetaret të rrethohen nga mbetjet e kashtës dhe shkrepëseve të Milanos fashiste”, tha Veliaj në një ceremoni inaguruese në Bulevardin e ri, aty ku pritet të ndërtohet dhe Bashkia e re e kryeqytetit.
Për Veliajn, mbrojtësit e godinës së vjetër të teatrit po lodhen kot. Ai madje u bëri të qartë se shembja do ndodhë me dijeninë e tyre.
“Për të gjithë ata që po lodhen aty, për mua rrini sa të doni , po nuk do ju’a bëjmë pa ditur, do ju lajmërojmë ditën që do të fillojë ndërtimi i Teatrit të ri. Në finale të gjithë do të mundohemi që të harrojmë kush ishte kundër, siç po harrojmë kush ishte kundër sheshit ‘Skënderbej’, Pazarit të Ri, Lodrave te Liqeni…”, tha Veliaj. /tesheshi.com/
