Kryetari i PD, Lulzim Basha akuzoi kryeministrin Rama se shkruan trakte kundër ndërkombëtarëve, të cilët sipas tij, e kanë braktisur.
Me anë të një gjuhe simbolike, Basha theksoi se “Rama shkruan natën traktet kundër partnerëve ndërkombëtare për t’i botuar ditën nga mediat e kapura prej tij”.
“Edi Rama është braktisur nga faktori ndërkombëtar dhe është bërë subjekt i barcaletave, është bërë personi më qesharak dhe i pabesueshëm në qarqet dipomatike dhe politike nga Bruskeli në Uashington. Tregohet me gisht, ka 2 vjet e gjysmë që kur u botua raporti i OSBE për pasurinë e tij prej 200 mln eurosh. Nuk ka më njeri serioz në botën politike dhe diplomatike të perëndimit që të marrë seriozisht Ramën”, tha Basha.
Duket se këto komente janë episodi i fundit i “betejës” mes kryeministrit dhe opozitës për të kapur mbështetjen ndërkombëtare dhe shfrytëzuar atë në dobi të kauzave të tyre. Më herët, kryeministri Rama akuzoi çadrën se thërret në ndihmë ndërkombëtarë që nuk e duan Shqipërinë.
Këtë të dielë, bashkëbisedimi në çadrën e protestës së opozitës u përqëndrua tek papunësia. Basha e caktoi prioritet të republikës së Re, punësimin e shqiptarëve e sidomos të të rinjve.
Kreu i opozitës kishte edhe një sugjerim për kryeministrin: “Në vend që të shpikë armiq të jashtëm, le të dalë dhe të flasë për Fatmir Xhafën”. /tesheshi.com/
