Kombet e Bashkuara paralajmërojnë një ndikim kolosal humanitar të ofensivës së planifikuar nga forcat pro-qeveritare të Irakut për rimarrjen e qytetit të Mosulit nga militantët. Sipas OKB-së, deri në 1.2 milionë njerëz që jetojnë në dhe rreth Mosulit mund të kapen në këtë operacion të papërgatitur e të sprovohen me vuajtje e vdekje, në këtë përpjekje për të marrë qytetin nga militantët e ISIS.
Deri më tani, 120 mijë njerëz janë zhvendosur nga luftimet, që nga marsi kur trupat e qeverisë spastruan territore në jug.
Në Irak, trupat qeveritare elitë tashmë kanë nisur operacionin për rimarrjen e qytetit të rëndësishëm, Qayyarah, 60 kilometra më në jug. Një zëdhënës i qendrës për kundër-terrorizmin, Sabah Numan tha se trupat po luftonin militantët në rrethina në bashkëpunim me njerëzit brenda qytetit.
Trupat irakiane planifikojnë të përdorin qytetin Qayyarah dhe bazën e tij ajrore si një mundësi logjistike për operacionin më të gjerë për Mosulin. Kryebashkiaku i qytetit, Saleh al-Jubouri, vlerësoi se rreth 15 mijë civilë janë bllokuar atje, por pjesa më e madhe e militantëve ose janë larguar ose janë vrarë.
Pasi të nisë beteja për Mosulin, edhe 400 mijë civilë të tjerë pritet të arratisen drejt jugut të qytetit, 250 mijë në lindje dhe 100 mijë të tjetër në veriperëndim.
“Ndikimi humanitar i një offensive ushtarake atje pritet të jetë kolosal”, u tha gazetarëve në Gjenevë, zëdhënësi i komisionerit të Lartë për refugjatët i OKB-së, Adrian Edwards.
Planet e emergjencës janë hartuar për t’u dhënë strehë deri në 120 mijë njerëzve që largohen nga Mosuli, ndërsa agjencia kërkon të ngrejë edhe deri në gjashtë kampe të reja përgjatë veriut të Irakut.
Por, gjithçka varet si nga mundësia për tokë të mjaftueshme dhe nga financimi. Apeli i UNHCR-së për mbledhjen e 584 milionë dollarëve për irakianët e shpërngulur deri tani është përmbushur vetëm 38 për qind dhe shumë pronarë tokash nuk kanë dëshirë të japin tokën e tyre me qira për agjencinë.
Më shumë se 3.38 milionë njerëz janë detyruar të largohen nga shtëpitë e tyre në Irak që prej vitit 2014, kur militantët e ISIS morrën nën kontroll pjesë të gjera territory në veri dhe në perëndim të vendit dhe shpallën krijimin e një kalifati që shtrihej deri në Sirinë fqinje.
Edhe një milionë irakianë të tjerë u zhvendosen si rezultat i konfliktit sectarian që pasoi pushtimin e drejtuar nga amerikanët në vitin 2003.
“Më e keqja nuk ka ardhur akoma”, thotë përfaqësuesi i UNHCR-së në Irak, Bruno Geddo. “Ne parashikojmë se e gjitha mund të rezultojë në një zhvendosje masive në një shkallë që nuk është parë botërisht për shumë e shumë vjet.
Përgatiti: Juli Prifti – /tesheshi.com/
