Eshtë futur në ditën e tretë beteja për nxjerrjen e ISIS-t nga Mosuli, nga fortesa e fundit në Irak. Ofensiva vazhdon, edhe pse është ngadalësuar nga shpërthimet. Komandantët irakianë flasin për përparim në dy fronte.
Një raportues i Al Jazeera-s nga terreni, Imran Hani, thotë se, “Bombardimet po intensifikohen. Dhe beteja po vazhdon.” A flet për marrjen e disa fshatrave nga luftëtarët kurdë peshmerga në rrugën drejt Mosulit.
Ndërkohë, një gjeneral irakian ka pohuar se beteja për çlirimin e Mosulit mund të zgjasë dy muaj.
Sipas tij, forcave irakiane mund t’u duhen dy javë për të arritur në Mosul, e dy muaj të tjerë për ta çliruar atë nga ISIS-i.
Gjenerali i forcave peshmerga, Sirvan Barzani, i deklaroi CNN-it se moti i keq mund ta bënte më të vështirë dhe më të gjatë betejën.
Përndryshe, UNHCR-ja ka njoftuar për 900 njerëz që e kanë lënë Mosulin dhe kanë kaluar në pjesën siriane të kufirit. BBC-ja thotë se ky është grupi i parë i civilëve të larguar që prej nisjes së ofensivës për marrjen e Mosulit.
Bashkërenduesja humanitare e OKB-së për Irakun, Lise Grande, ka thënë se organizata po punonte ndërsa mendohet se 200.000 njerëz mund të kenë nevojë për strehim në ditët dhe javët e para të operacionit. /tesheshi.com/
