Përplasja më e fundit e më e re mes Albin Kurtit e Hashim Thaçit në kulmin e krizës koronare, është ajo për udhëheqjen e dialogut me Serbinë.
Kurti e ka bërë fakt të kryer atë që ai e jo Thaçit, duhet të jetë në krye të dialogut, sigurisht pa e përjashtuar presidentin.
Në një letër dërguar Lajçakut, të dërguarit të sapoemëruar e saponisur punë të BE-së për dialogun, Kurti qartëson:
“Dialogu duhet të ndërmjetësohet nga Bashkimi Evropian dhe Shtetet e Bashkuara të Amerikës. Pas kësaj, marrëveshja përfundimtare duhet të shoqërohet me një garanci nga Bashkimi Evropian dhe Shtetet e Bashkuara që obligon zbatimin e ndërsjellë dhe të plotë të marrëveshjes.
Marrëveshja duhet të shoqërohet me një paketë masash politike, ekonomike dhe financiare që do të përshpejtonin konvergjencën e standardit të jetesës në të dyja vendet, si dhe integrimin e tyre në Bashkimin Evropian.
Si Kryeministër, jam i obliguar sipas Kushtetutës që të themeloj dhe udhëheq ekipin negociator. Prandaj, plani im është që të krijoj një ekip gjithëpërfshirës dhe të balancuar në baza gjinore. Përbërja e ekipit do të jetë si në vijim:
- Albin Kurti – Kryeministër dhe Udhëheqës i ekipit negociator
- Hashim Thaçi – President, anëtar
- Vjosa Osmani – Kryetare e Kuvendit, anëtare
- Përfaqësuesi i LVV, anëtar
- Përfaqësuesi i LDK,anëtar
- Përfaqësuesi i PDK,anëtar
- Përfaqësuesi i AAK-PSD,anëtar
- Përfaqësuesi i NISMA-AKR,anëtar
- Përfaqësuesi i Listës Serbe,anëtar
- Përfaqësuesi i Grupit 6+,anëtar”, shkruan Kurti.
Por në një reagim të ardhurb nga Presidenca, atij i kujtohet se është i rrëzuar, e se për këtë arsye nuk mundet t’i cakojë vetes rol udhëheqës në dialog.
“Kryeministri është i shkarkuar nga Kuvendi i Republikës së Kosovës dhe është kryeministër në largim i një qeverie në largim. Ai përveç që nuk është konsultuar me Presidentin si udhëheqës i politikës së jashtme, me këtë qasje është duke e shkelur edhe hierarkinë kushtetuese”.
“Kryeministri i shkarkuar është i delegjitimuar nga votat e shumicës absolute të përfaqësuesve të popullit në Kuvendin e Kosovës dhe nuk mund të bëjë zotime në emër të institucioneve të Republikës së Kosovës dhe as në emër të një qeverie në largim”.
Lista e delegacionit të propozuar nga kryeministri i shkarkuar mbetet një dëshirë personale e tij dhe asgjë më shumë”, u tha nga Presidenca kosovare.
Kosova po përjeton këto ditë një situatë të pangjashme me asnjë vend tjetër të përfshirë nga kriza koronare, duke vuajtur paralel një krizë të rëndë edhe politike. /tesheshi.com/
