Gara për komunën e Deçanit ka përplasur deputetët Daut Haradinaj nga AAK dhe Dardan Molliqaj nga Vetëvendosje, të cilët vijnë nga ky qytet.
E gjitha ka nisur pasi Haradinaj ka publikuar disa fotografi nga fshati Prilep ku shihet një numër i madh i simpatizantëve të AAK-së për këtë komunë, me ç’rast ka vlerësuar se partitë e tjera vetëm mund të ëndërrojnë balotazhin.
“Ata që po ëndërrojnë që Deçani shkon në balotazh , munden lehtësisht me i pa pamjet vetëm të këtij fshati. Prilepi i luftës dhe paqes që ka në krye të listës Dr. Haki Shehun dhe Fikriun për asamble , tregon për përkrahjen e madhe që e ka Bashkimi. Prilepi nuk kishte vend për të gjithë ata njerëz”, ka shkruar Haradinaj.
Por i menjëhershëm ka qenë reagimi i vetëvendosësit Molliqaj i cili mendon se Deçani do të shkojë në balotazh.
“Fatmirësisht, deçanasit kësaj here do të votojnë përtej subjekteve partiake. Zekë Sinanaj po e merr mbështetjen e simpatizuesve të të gjitha partive në Deçan. Kjo po e shqetëson shumë Dautin dhe AAK-në. Shihemi në balotazh”, ka shkruar Molliqaj. /tesheshi.com/
