Nuk ka përfunduar ende odiseja e zgjedhjeve lokale në Maqedoni. Pas vendimit të Komisionit shtetëror të Zgjedhjeve që të rikthejë në votim komunën e Çairit, pra Shkupin e vjetër apo pjesën shqiptare të tij, temperaturat politike janë ngritur shumë.
Thuajse e gjithë energjia qeveritare e partisë së Ali Ahmetit është përqëndruar që ta fitojë me çdo kush duelin e pabarabartë me intelektualin Zeqirija Ibrahimi, përfaqësuesin e koalicionit ALEANCA ME BESË, i cili edhe pse pa asnjë mbështetje qeveritare ka arritur që të ndalojë fitoren e BDI+LSDM.
Dje votuan personat e sëmurë dhe të dobët, kurse sot është zhvilluar procesi i votimit, i cili sipas disa organizatave jo-qeveritare është shoqëruar me pjesëmarrjen e njerëzve me pushtet në qendrat e votimit, të cilët dekurajonin zgjedhësit që të mos votonin.
Nga Komsioni Komunal i Zgjedhjeve në Çair, për MIA-n deklaruan se tre persona të sëmurë janë paraqitur për të votuar, prej të cilëve të drejtën e votës e realizuan dy vetë.
Ndërkaq, rezultatet e votimit të sotëm do të përcaktojnë automatikisht fituesin sado e ngushtë të jetë fitorja. Kandidati për kryetar nga rradhët e BDI, pas balotazhit ishte në avantazh me vetëm 209 vota. Lëvizja BESA dorëzoi prova se rezultati është deformuar ndaj dhe paraqiti 89 ankesa.
Ankesat më së shumti kishin të bënin me procesin e numërimit të votave, ku në disa qendra, vota qartazi për Zeqerija Ibrahimi janë konsideruar si të pavlefshme. /tesheshi.com/
