Në vijim të betejes së tij kontraverse me qeverinë, presidenti Meta ka shpalosur idenë e themelimit të një medie të re.
“Dhe Bordi Drejtues do jetë i përbërë vetëm nga gazetarë kurajozë të cilët janë shantazhuar, kërcënuar dhe lënë pa punë nga regjimi”, shkruan njeriu që mban pozicionin e lartë të kreut të shtetit.
Madje shkon deri aty sa fton madje gazetarë që të raportojnë të ai nëse kanë presion nga pushteti.
“Ju lutem gazetarëve të më njoftojnë që kur të gjithë pronarët e tyre të dorëzohen para presioneve të pushtetit, të themelojmë së bashku një media transparente që ta nisë Kohën e Re me Përmbysjen e këtij regjimi të neveritshëm mediatik që turpëron çdo njeri me minimum dinjiteti.
Mos u dorëzoni para presioneve të pushtetit dhe pronarëve!” u shpreh Meta.
Sipas tij, qeveria ka tmerr nga fjala e lirë.
“Tmerri nga fjala e lirë dhe pasqyrimi i së vërtetës është tipari kryesor i regjimeve kriminale që nuk e bazojnë qeverisjen mbi votën e lirë dhe fjalën e lirë, por në mbajtjen të shtypur dhe të frikësuar të popullit të tyre.
Asgjë nuk e ndal Ndryshimin!
Madje koha e Ndryshimit ka kaluar prej 4 vitesh.
Tani ka ardhur Kohë tjetër!”, shkruan njeriu në presidencë.
Reagimi i tij vjen pas publikimit të disa mesazheve mes kryebashkiakut Veliaj dhe pronarit të Ora News Ylli Ndroqi, ku i pari i ankohet të dytit për kronikat e një gazetareje. /tesheshi.com/
