Kongresi i lëvizjes për reforma në PDSH që u mbajt të Dielën, në të cilin kryetar u zgjodh Zijadin Sela, ka nisur një beteje të re mes tij dhe Menduh Thaçit. Bëhet fjalë për një betejë juridike, për të dëshmuar se cili është kryetari legjitim i partisë.
Thaçi posedon vulën e partisë, dhe është e paimagjinueshme ta dorëzojë pasi veten e llogarit kryetarë legjitim, ndërkohë që për fraksionin e Selës, PDSH është parti e themeluar nga Arbër Xhaferi dhe ajo nuk mund të bëhet pronë private, ndërsa pretendojnë të kenë mbi 22 mijë anëtarë.
Secili prej tyre, argumentet do ti parashtrojë në gjyq, ku do të vendoset se kujt do ti takojë vula e partisë.
Sidoqoftë, Menduh Thaçit po i përsëritet historia, pasi atë që po ja bën Zijadin Sela, të njëjtën gjë Thaçi ia bëri Partisë për Prosperitet Demokratik në vitin 1994, ndërsa në pamundësi të marrë legjitimitet, u detyrua të formojë subjekti politik, të cilin e drejton tani.
Profesori universitar Mersel Bilalli, deputet i Partisë për Prosperitet Demokratik në vitin 1994, thotë për “tesheshi.com” se analogjia mes këtyre dyjave është vetëm në formë, por jo edhe në përmbajtje.
“Mendoj se do të ketë ngjashmëri me atë që i ndodhi PPD-së në vitin 1994 kur u nda në dy pjesë dhe vetëm një deputet shkoi nga krahu i Thaçit, por gjykoj se tani do të ndodhë e kundërta. Sela as që duhet të insistojë të marrë vulën e partisë, sepse është humbje kohe në procedura të cilat nuk i fiton dot, madje emri PDSH tani nuk asocion pozitiv, përkundrazi”,- shprehet Bilalli.
Njohësit e çështjeve juridike nuk dëshirojnë të komentojnë epilogun, dhe kjo nga disa arsye. E para, nuk dëshirojnë të marrin anë në konfliktin Thaçi-Sela, nuk dinë saktë se cilat argumente posedojnë palët, ndërsa sipas tyre, gjyqësori i politizuar mund të komplikojë edhe më shumë situatën.
Vet bashkëpunëtorët e afërt të Thaçit, të cilët e braktisën, thonë se çështja e vulave për momentin është një formalitet që nuk ka nevojë të bëhet fiksim. Sulejman Rushiti- ish ministër për Arsim dhe Shkencë në periudhën 2006-2008, në kohën kur Thaçi ishte në qeveri, thotë se oferta politike do të përcaktojë se ku do të shkojë vula.
“Ajo që është me rëndësi është oferta politike. Është e qartë se në aspektin numerik lëvizja për reforma ka më shumë mbështetës dhe nëse oferta do të jetë në vazhdimësi e mbështetur atëherë vulat do të kalojnë vetvetiu aty ku takojnë. Pra, jam ithtar i mendimit që për momentin e rëndësishme është të krijohet platforma dhe strategjia e veprimit dhe të kërkohet përkrahja. Përkrahja është ajo që do t’i definojë formalitetet”-shprehet Rushiti. Pakënaqësi me politikat e Meduh Thaçit ka patur edhe më herët.
Në vitin 2005, nënkryetari i atëhershëm i Partisë Demokratike Shqiptare, Imer Selmani,u largua nga kjo parti, dhe formoi Demokracinë e Re./tesheshi.com/
