Sot në Paris është beteja e madhe mes përkrahësve të Kosovës dhe atyre të Serbisë për të pranuar Kosovën si anëtare me të drejta të plota të Organizatës Botërore të Trashëgimisë kulturore.
Asambleja e Përgjithshme e UNESCO-s, anëtarë të së cilës janë thuajse të gjithë vendet anëtare të OKB-së, do të duhet të ngrenë duart për të miratuar propozimin e kryesisë që ka futur në rendin e ditës votimin për shtetin më të ri në botë.
Sipas llogaritjeve paraprake në bazë të lobimit, qeveria e Kosovës së bashku me aleatët e saj llogarit që 92 vende anëtare të UNESCO-s do të votojnë pro anëtarësimit të Kosovës në këtë organizatë.
Burime pranë qeverisë bëjnë të ditur se pragu prej dy të tretave i votave nga 195 vendet anëtare të UNESCO-s do të jetë vështirë për t`u arritur.
Sot nuk pritet miratimi por shtyrja në një seancë tjetër ku do të votohet përsëri.
Shefi i diplomacisë së Kosovës, Hashim Thaçi është shprehur se “nesër do ta shpërndajmë revistën tonë në UNESCO. Një votim do ta kemi për shtyerje të vendimit. Votimi i dytë është për anëtarësi dhe në këto momente ende po e shtymë agjendën tonë. Falënderoj të gjithë qytetarët dhe miqtë nga mbarë bota që e përkrahin fushatën e dashurisë për njëri-tjetrin, shpresës për Kosovën dhe integrimit në botë.”
Burime qeveritare bëjnë të ditur se deri tani 62 vende anëtare janë deklaruar se do të votojnë pro.
Mbetet i paqartë vendimi i 30 shteteve ende të padeklaruara se si do të votojnë.
Petrit Selimi, zëvendësministër i Jashtëm i Kosovës, i cili ka disa ditë që qëndron në Paris, ku edhe po mbahet Konferenca e Përgjithshme e UNESCO-s, tha për Radion Evropa e Lirë se anëtarësimi ka gjasa reale mjaft pozitive.
“Është e qartë se shumica e botës e dëshiron Kosovën në UNESCO, por Kosovën e pret një prag i lartë, i dy të tretave të të gjitha votave dhe jemi duke u fokusuar që një numër sa më i madh i shteteve ta marrë vendimin e duhur dhe të lejojë që Kosova të bëhet anëtarja e 196 e UNESCO-s, në 70-vjetorin e organizatës”, tha Selimi. /tesheshi.com/
