Dy nyjet e fundit që mbajnë pezull dy deputetë janë Rrogozhina dhe Shkodra.
Po numërohen kutitë e fundit të qarkut të Tiranës dhe Shkodrës, të cilët ose i japin PS-së 75 mandate dhe lënë Shpëtim Idrizin jashtë Parlamentit, ose e lënë Ramën me 74 deputetë, duke shpëtuar in extremis kreun e PDIU-së.
Idrizi, i cili aktualisht është jashtë kuotës për deputet, shpreson tek votat e Rrogozhinës, pasi atje ka një numër të konsiderueshëm popullsie me origjinë nga krahina e Çamërisë.
Ndërkaq në Shkodër PD ka marrë 5 deputetë, por ende është pezull pasi po numërohen votat e fundit të Malësisë së Madhe dhe ka gjasa që PS-së t’i rikthehet mandati i marrë dje dhe të udhëheqë qarkun.
Ndërkaq, sipas Komisionit Qendror të Zgjedhjeve deri në orën 7:30 janë numëruar 5.112 kuti nga 5.362 gjithësej.
Zëdhënësja e KQZ-së ka bërë me dije se janë numëruar 95.34 për qind e votave dhe se kutitë e mbetura janë në rrethet e vendit.
Nga numërimi i deritanishëm, PS ka siguruar 74 mandate, PD 43, LSI 19, PDIU 3 mandate dhe PSD 1 mandat. /tesheshi.com/
