Tenderat si duket janë dhe “sëmundje” ballkanike e jo vetëm shqiptare. Ethet e tyre kanë kapur fort sidomos serbët, ata të veriut të Kosovës, të cilët duke qenë pjesë të një shteti që e shpërfillin hapur, iu është shtuar akoma dhe më shumë oreksi për t’u pasuruar me fonde publike.
Shembulli më flagrant është ai kyetarit të komunës së Zubin Potokut, Stevan Vulloviq, i cili me kompaninë e tij Elektromont, është shndërruar në specialist për marrjen e tenderave. Madje kohë më parë, ai u përshfi në një rrahje në publik me ish-paraardhësin e tij, Sllavisha Ristiq, për shkak të një tenderin prej një milion eurosh për asfaltimin e një rruge 20 km në bjeshkët e Mokra Gorës.
Një burim i tha tesheshi.com se si gjithmonë, tenderin e kurdisur për asfaltimin e kësaj rruge e ka fituar kompania e kryetarit Vulloviq, por që të pakënaqur me këtë vendim, serbët e fshatit Crepul, Dreth dhe Jabuka të cilët janë në krah të ish-kryetarit Ristiq, dolën në një protestë duke djegur dhe gomat e makinave që do të përdoreshin në asfaltimin e rrugës e cila lidh Zubin Potokun me komunën e Skënderajt dhe Istogut, pikërisht me fshatin Syriganë dhe Banjë.
Dhe një serb i fshatit Crepul që nuk ka dashur të identifikohet, ka thënë se kjo rrugë nuk do të asfaltohet deri sa kryetari Vulloviq të heqë dorë nga hajnia.
“Çdo tender duhet patjetër ta fitoje kompania Elektromont e Vulloviqit, ndërkohë që ka pasuar edhe shumë kompani të shqiptarëve të Kosovës që kanë aplikuar për këtë tender dhe që kanë dhënë çmime shumë më të favorshme, por që Vulloviqi të gjitha i ka shmangur” ka thënë banori i Crepulës për tesheshi.com.
Fondet për rrugën i ka ndarë qeveria e Kosovës, e deri sa të zgjidhet ngërçi mes kryetarit Vulloviq dhe banorëve të Mokra Gorës, duket se rruga nuk do të asfaltohet.
Sakaq, një burim nga komuna e Zubin Potokut, tha se institucionet e Prishtinës, edhe pse derdhin fondet e tyre për të tilla vepra publike që më pas keqpërdoren nga autoritetet lokale, qoftë dhe duke u përfituar padrejtësisht, kurrë nuk reagojnë.
Ndërkohë duhet shtuar se rruga që pritet të asfaltohet e që lidhë Zubin Potokun me komunën e Skënderajt dhe Istogut, njihet dhe si rruga ku bëhet kontrabanda më e madhe e mallrave nga Serbia për në Kosovë. M.Mustafa–/tesheshi.com/
