Nata e djeshme para Komisionit Shtetëror Zgjedhor në Maqedoni, ku po vendosej mbi ankimimet e opozitës, LSDM-së dhe Lëvizjes BESA mbi parregullsitë zgjedhore kaloi në një atmosferë mjaft të tensionuar.
Ishin simpatizantët e partisë maqedonase në pushtet, VMRO-DPMNE-së, në krye me disa nga funksionarët e kësaj partie, ata të cilët dje ishin mbledhur para KSHZ-së për t’i bërë presion anëtarëve të saj, në mënyrë që mos të pranojë çdo lloj ankese për ndryshimin e rezultatit në disfavor të partisë së tyre.
Mirëpo, ajo që tërhoqi vëmendjen më të madhe ishin fjalimet kërcënuese dhe ofenduese, si të simpatizantëve, ashtu edhe të zyrtarëve të VMRO-së në drejtim të KSHZ-së dhe eksponentit të tyre politik në taborin kundërshtar, kryetarin e LSDM-së, Zoran Zaev.
I pari, protestuesve para KSHZ-së i’u drejtua bartësi i listës për deputetë në rradhët e VMRO-së, Ilija Dimovski. Ai i bëri thirrje KSHZ-së që të ketë kujdes çfarë vendimi do të sjellë, ndryshe populli nuk kthehet mbrapa.
“Nuk do të lejojmë politika në dëm të Maqedonisë, nuk do të lejojmë që shtetin t’a udhëheqin njerëz që janë të gatshëm për tradhtinë më të madhe të Maqedonisë. Anëtarët e KSHZ-së duhet të dinë se sonte e bartin përgjegjësinë më të madhe dhe nga ata varet se a do të jetë ky shtet normal dhe me prosperitet. Të mos mendojnë se ky popull ka fuqi që të tolerojë më shumë. Kemi fuqi t’a respektojmë demokracinë dhe zërin e popullit. Kthim mbrapa s’ka” theksoi Dimoski para qytetarëve të mbledhur para KSHZ-së.
Deputeti tjetër i përkatësisë etnike të romëve, Amdi Bajrami ishte edhe më i ashpër se bashkëfolësi i tij. Sipas tij, kreu i LSDM-së, Zoran Zaev së shpejti do të ketë një funeral, ndërsa qytetarët do t’i ndezin qirinj në varreza.
“Zaevi shumë afër do ta ketë funeralin. Shumë shpejt do t’i vijë vdekja. Do të jetë në kardiologji, do të pësojë infarkt për disa ditë. Atje do të shkojmë për vizitë. Do t’i ndezim qirinj edhe në varreza”, kështu i’u është drejtuar protestuesve Amdi Bajram.
Duke mbajtur një fjalim plot me kërcënime dhe ofendime, të pranishmit kanë brohoritur: “ashtu është”.
Ajo që befasoi më shumë në fjalimin e saj, ishte kryetarja e Komisionit për Marrëdhënie Fetare, Valentina Bozhinovska. Ndonëse ajo ishte njëra nga kundërshtaret më të mëdha të Nikolla Gruevskit, tani e mbron edhe me kërcënime VMRO-DPMNE që dikur e sulmonte. Sipas saj, në rast se KSHZ e anulon vullnetin e qytetarëve nata e djeshme do ishte “nata e thikave të gjata”, që është operacion i cili është kryer në Gjermani më 30 qershor dhe 2 korrik të vitit 1934, kur regjimi nazist eleminuan të paktën 85 persona për arsye politike.
Ndërkohë, kryetarja e Komisionit për Marrëdhënie Fetare, e cila në vend se të kujdeset për barazi, tolerancë dhe pajtim, i hodhi benzinë zjarrit.
Të gjitha këto fjalime me përmbajtje ofenduese, urrejtje dhe kërcënuese në Maqedoni llogariten si vepër penale dhe të dënuara me ligj.
Përveç tjerash, ashtu siç shkruajnë mediat shqiptare në Maqedoni, thuhet se protestuesit kanë kënduar këngë me përmbatje raciste për shqiptarët duke i quajtur “Shqiptar i vdekur, shqiptarë i mirë”, dhe “shqiptarë të mjerë”.
Kujojmë se rezultati i zgjedhjeve të parakohëshme parlamentare të mbajtura para disa ditësh në Maqedoni, vijon kështu: VMRO-DPMNE (51 deputetë), LSDM (49 deputetë), Lëvizja BESA (5 deputetë), Aleanca për Shqiptarët (3 deputetë), dhe PDSH (2 deputetë).
Ndërsa KSHZ dje ka hedhur poshtë të gjitha ankimimet e Lëvizjes BESA mbi parregullsitë zgjedhore, dhe 5 nga tetë ankimime të LSDM-së. Të tjerat janë në shqyrtim e sipër, megjithatë pas një proteste masive të partisë maqedonase në pushtet, vështirë që KSHZ të marrë guximin e të pranojë ndonjë nga ankimimet e LSDM-së dhe të ndryshojë rezultatin e zgjedhjeve./Nga Mensur Krasniqi-tesheshi.com/
