Në kulmin e fushatës për zgjedhjet parlamentare, një betejë tjetër po zhvillohet në sfond: ajo e vetingut.
E lënë jashtë vëmendjes së mediave që po gjejnë ushqim nga batutat dhe suprizat e një fushate të padëgjuar më parë, ku partia e Ilir Metës po merr goditje “të djathta” nga një “boksier” që nuk ia merrte mendja, pra Lulzim Basha, tryeza e vetingut në komisionin e posaçëm parlamentar ka rreshtuar hapur forcat në fushë: PS kundër LSI+PD.
E thënë më shkoqur, Luan Rama, numri dy i LSI-së, besnik i fortë i Ilir Metës, është bërë bashkë me tre njerëz të afërt të Sali Berishës: Flamur Nokën, Fatmir Mediun dhe Oert Bylykbashin.
Kjo aleancë duket si diametralisht e kundër me atë që po ndodh në fushatë, ku Lulzim Basha edhe sot u kërkoi votuesve në Pogradec që t’i hedhin në gjol votat e LSI-së, pasi ajo nuk do të vijë në qeveri.
Por ç’po ndodh në sallën e vetingut?!
Ka pasur dy zhvillime: nga njëra anë amerikanët e Operacionit Ndërkombëtar të Monitorimit, të cilët janë 4 prokurorë të njohur federalë, kanë vendosur në “listë të zezë” disa gjyqtarë të afërt me ish-kryeministrin Sali Berisha, ndërkohë që Flamur Noka dhe Luan Rama i janë vërvitur ish-kryeprokurores Ina Rama, duke u munduar t’i gjejnë problem në karrierën e saj.
Një debat ndërmjet ironisë dhe sarkazmës është zhvilluar ndërmjet Flamur Nokës dhe Ina Ramës, ku ish-ministri i Brendshëm e akuzoi ish-Prokuroren e Përgjithshme se nuk ka shkarkuar prokurorët e akuzuar nga Ministria e Drejtësisë.
Ndërkohë Ina Rama i është përgjigjur se prokurorët e akuzuar për korrupsion, pasi u shkarkuan nga ajo u rikthyen përmes gjykatës.
PD nga ana e saj po përpiqet që të rrëzojë kandidatët e komisioneve të vetingut që ajo i shikon si të papërshtatshëm.
Por ndërkombëtarët e OMN-së nuk i kanë dhënë shumë zgjidhje; kanë dërguar në komisionet parlamentare juristë që nuk shikohen me sy të mirë nga njerëzit e Berishës dhe ata nuk kanë shumë alternativa.
Procesi i verifikimit dhe filtrimit të kandidatëve, të cilët kanë aplikuar për dy organet e vetingut që do të marrin në sitë të gjithë prokurorët e gjyqtarët, pra komisionin e vetingut dhe Kolegjin e Apelimit, ka hyrë në një fazë vendimtare, atë të votimit të kandidatëve për miratim në Parlament.
Pikërisht në këtë fazë, njerëzit e Berishës të mbështetur edhe nga Luan Rama i LSI-së, ka nisur një ofensivë të re sulmesh në adresë të Operacionit Ndërkombëtar të Monitorimit dhe Avokatit të Popullit, dy institucionet e para që bënë edhe seleksionimin e parë të kandidatëve.
Sipas tyre, 68 kandidatët që kanë marrë miratimin e OMN janë lista e Edi Ramës, ndërsa kërkuan kualifikimin e disa kandidatëve të përfshirë në listën e zezë, kërkesë kjo që u hodh poshtë nga socialistët.
Noka, Mediu, Bylykbashi dhe Luan Rama këmbëngulën tek “lista e zezë” me kandidatët e skulifikuar, të cilat sipas tyre përmban aplikantë të aftë për të bërë vetingun e 800 gjyqtarëve dhe prokurorëve.
Mirëpo për ndërkombëtarët ky është kapitull i mbyllur.
Ekspertët e ONM, për çdo kandidat, në përgjigjen e skualifikimit, kanë shënuar arsyet, duke përfshirë, sipas rastit, edhe lidhjet politike me ish-pushtetin e kontrolliuar nga Partia Demokratike, sidomos në drejtësi.
Nga 125 kandidatë të skualifikuar nga Avokati i Popullit se nuk përmbushin kriteret formale si të përfshirë në listën e zezë të ONM, janë edhe disa këshilltarë të ish-ministrave të Sali Berishës. Konkretisht, në listën e të përjashtuarave, është përshirë Ermonela Xhafa, e cila rezulton që të ketë qenë këshilltare e ministrit të Drejtësisë në vitin 2013, pra e Eduard Halimit. Po ashtu, është përjashtuar Klejda Ngjela, këshilltare e ministrit të Punës së Çështjeve Sociale në vitet 2005-2010, si dhe Kostandin Kazanxhi, i cili ka qenë këshilltar ligjor i ish-ministrit të Financave Ridvan Bode në vitin 2008.
Në listën e të përjashtuarve është përfshirë edhe Shaqir Hasani, aktualisht këshilltar i Presidentit Bujar Nishani. Hasani është konsideruar nga Avokati i Popullit si kandidat politik, ndonëse ai pretendon se Presidenca është e pavarur. Në listën e zezë është futur edhe Krenar Ahmeti, ish-funksionari i lartë i Policisë së Shtetit gjatë pushtetit të PD, i cili ka pasur disa incidente me funksionarë të PS, kur kjo e fundit ishte në opozitë.
Ahmeti është përjashtuar nga ONM për sjellje kriminale, por ai ka deklaruar se është rehabilituar dhe se nuk ka asnjë pengesë ligjore për të kandiduar.
“Lista e Zezë”
Ermonela Xhafa, këshilltare e ministrit të Drejtësisë në vitin 2013.
Klejda Ngjela, këshilltare e ministrit të Punës së Çështjeve Sociale 2005-2010.
Kostandin Kazanxhi, këshilltar ligjor i ish-ministrit Ridvan Bode në vitin 2008.
Shaqir Hasani, këshilltar i Presidentit Nishani, i konsideruar nga Avokati i Popullit si politik.
Krenar Ahmeti, ish-funksionari i lartë i Policisë së Shtetit gjatë pushtetit të PD. /tesheshi.com/
