Kreu demokrat Basha ka shtuar dozat e mbrojtjes së kauzës 6-mujore, nisur me djegie mandatesh e përfunduar me bojkot zgjedhjesh, duke iu adresuar dhe një beteje të brendshme gati për shpërthim, prej zërave kundër në PD gjithnjë e në rritje, tashmë që po lë një nga një e pa asnjë rezistencë edhe ato pak bashki që posedonte.
Nga Patozi, Basha deklaroi: “Janë pikërisht protestat popullore, është qëndresa juaj, kurajo juaj, vendosmëria juaj që ka zgjuar kurajon dhe ka vetëdijesuar gjithë shqiptarët përfshirë zgjedhësit e ndershëm socialistë, se 30 qershori nuk bëhej për ta, por për një klikë hajdutësh, që ka thyer çdo rekord babëzie dhe hajdutërie në Shqipëri dhe në Ballkan”.
Më pas, ai iu kthye dhe vetë forcës që përfaqëson, duke thënë se dhe ajo duhet të ndryshojë.
“30 qershori nuk është thjeshtë dhe vetëm refuzimi i Edi Ramës dhe regjimit të tij, nuk është thjesht një kryengritje masive popullore kundër mjerimit ekonomik që ai ka mbjellë, papunësisë, varfërisë. Është edhe një thirrje popullore për ndryshim. Dhe kjo thirrje i drejtohet të vetmit faktor politik që ka kapacitetet, burimet njerëzore, vizionin, planin për ta bërë këtë ndryshim të mundur, që është Partia Demokratike e Shqipërisë dhe Opozita e Bashkuar”, theksoi Basha. /tesheshi.com/
