Në kuadër të samitit të G20 në Romë, liderët e shumë vendeve vizituan shatërvanin magjepsës të Trevit dhe respektuan traditën e hedhjes së monedhave në ujë.
Udhëheqësit bënë foto përpara shatërvanit më të madh barok në Romë dhe hodhën në ujë monedha 1-euroshe, me dëshirën për t’u kthyer në qytet, sipas një bestytnie.
Midis tyre ishin presidenti francez Emmanuel Macron, kancelarja gjermane Angela Merkel, kryeministri britanik Boris Johnson, kryeministri spanjoll Pedro Sanchez, kryeministri indian Narendra Modi dhe presidenti i Këshillit Evropian Charles Michel.
Në rit nuk morën pjesë presidenti turk Rexhep Tajip Erdogan, si dhe homologu i tij amerikan Joe Biden dhe disa pjesëmarrës të tjerë të samitit.
Vizita e liderve te shatërvani i Trevit u shoqërua me masa maksimale të sigurisë. /tesheshi.com/
