Sot nisi viti i ri akademik në Shqipëri i cili përkon dhe me një debat të nxehtë mbi cilësinë e universiteteve e jo vetëm. Universitetet shtetërore përsëri marrin pjesën më të madhe të studentëve, gati 90 % me 22900 kuota të lira, ndërsa privatit i mbetet një pjesë e vogël e tregut me vetëm 9381 kuota gjithsej.
Jo të gjitha kuotat janë plotësuar dhe pse nga bankat e gjimnazeve këtë vit dolën 32 mijë maturantë. Sipas të dhënave, vetëm 17491 studentë janë regjistruar në universitetet shtetërore dhe vetëm 3383 studentë në universitetet private duke krijuar një hendek mes vendeve të lira dhe kërkesave për shkollë.
Specialistë të arsimit të kontaktuar nga tesheshi.com besojnë se në rënien e numrit të të rinjve që i drejtohen universitetit kanë ndikuar dy faktorë: e para, maturantët me mesatare nën 6, të cilët sipas ligjit të ri nuk mund të regjistrohen në universitet por vetëm në një kolegj të lartë profesional, dhe e dyta, trendi i emigracionit. Sipas tyre, shumë të rinj preferojnë çdo vit e më shumë të studiojnë jashtë sesa në universitetet shqiptare.
Sipas statistikave të UNESCO-s për vitin 2016, rreth 11,637 studentë shqiptarë studiojnë në Itali, e më pas vjen Greqia me 8,209 studentë.
Por një prej debateve më të mëdha që bëhet sot për arsimin e lartë ka të bëjë me faturën për studentin apo familjen e tij.
Sepse ndërsa zgjedhja për të shkuar në privat varet nga vendimi i çdo familje për të paguar për studimet, universitet shtetërore presupozohet që janë falas. Por a janë vërtet ato falas? Jo! Dhe, për nga fatura që mbartin mund të krahasohen me arsimin publik në vendet më të zhvilluara të Europës si Franca apo Gjermania. Tarifat e shkollimit në vendet e Europës variojnë nga 250 euro në Francë deri në 16,000 euro në Danimarkë apo 24 mijë euro në Angli, por ka dhe vende si Gjermania apo Norvegjia, ku tarifat e shkollimit janë zero.
Nga viti 2013 e deri më sot, çmimet për t’u regjistruar në një universitet publik janë 25-fishuar ose 39-fishuar.
Besohet se çmimet e aplikuara gjatë vitit të vjetshëm akademik do të jenë në fuqi dhe për këtë vit dhe ato variojnë nga 25 mijë lekë të reja në vit deri në 40 mijë lekë të reja në vit, në varësi të fakultetit dhe degës së studimit për ciklin e parë të studimeve.
Ndërsa për studimet-master studentët do të duhet të paguajnë sipas profilit që do të ndjekin, nga 63 mijë deri në 204 mijë lekë të reja në vit.
Tarifat më të larta të studimit i ka Universiteti i Mjekësisë. Ato variojnë nga 35 mijë lekë deri në 45 mijë lekë në vit.
Pra, s’ka arsim falas dhe për më tepër rezulton një arsim pa cilësi, siç konkludoi dhe akreditimi britanik i fundit ku Universiteti i Tiranës ngeli në klasë me vetëm 1 vit akreditim. /tesheshi.com/
