Besimet fetare në Shqipëri janë bërë bashkë për të kundërshtuar një projekligj të qeverisë mbi shëndetin riprodhues, i cili ngjan të jetë marrë copy-paste nga vende të tjera, duke injoruar tërësisht kontekstet sociale shqiptare. Aty, pika më e debatueshme është surrogacia mëmësore, si dhe lejimi i abortit deri në javën e 14, gjë që i ka vendosur komunitetet fetare kundër qeverisë, edhe pse kjo e fundit sapo ndau fondin vjetor për to pak ditë më parë.
Sipas A2 CNN, pesë komunitetet, pasi shqyrtuan draftin e ministrisë së Shëndetësisë, më anë të Këshillit Ndërfetar e ka cilësuar të papranueshme dhe të dëmshme për familjen dhe shoqërinë shqiptare ligjërimin e surrogacisë, të sterilizimit me dëshirë, lejimin e abortit deri në javën e 14, si dhe çështje të tjera që dëmtojnë konceptin e familjes.
Ndaj ky këshill, i është drejtuar zyrtarisht krerëve më të lartë të shtetit dhe Avokatit të Popullit duke kërkuar të qënit me pjeëmarrës në shqyrtimin e draftit.
“Këshilli Ndërfetar i Shqipërisë, si grup interesi, kërkon të ndërpritet shqyrtimi i projektligjit në fjalë pa pjesëmarrjen e tij në seancat konsultative në Ministrinë e Shëndetësisë; t’i njihet e drejta të paraqesë vëzhgimet, prapësimet dhe kundërshtitë lidhur me projektligjin; si dhe të bëhet pjesë e dëgjesave publike të këtij projektligji. Në rast të kundërt, Këshilli Ndërfetar kërkon që projektligji ‘Për shëndetin seksual dhe riprodhues’ të mos kalojë në Kuvendin e Shqipërisë.
Me dëshirën që kërkesat tona, të cilat përfaqësojnë vullnetin dhe qëndrimet e të gjithë besimtarëve tanë, pjesë e pesë komuniteteve fetare zyrtare dhe shoqërisë shqiptare, të marrin vëmendjen e duhur nga ana e institucioneve ligjzbatuese dhe të gjithë së bashku, të punojmë për një të ardhme më të mirë e më të sigurt për brezat e rinj, me besim te Zoti e te ligji për të mirën e përbashkët”.
Gjithashtu, kjo nismë e Ministrisë së Shëndetësisë është kundërshtuar dhe nga një grup mjekësh specialistë të fushës.
Dhe nga ana tjetër, dikasteri përkatës nuk thotë se kush e ka hartuar draftin, pra kush janë njerëzit që janë marrë me përgatitjen e tij, të cilët duhet ta dalin dhe ta mbrojnë atë në publik.
Pikërisht fakti se nuk thuhet asgjë për këtë pjesë, autorësinë e projektligjit, aludohet se ai është marrë i gatshëm nga vende të tjera dhe thjesht është përkthyer, si me disa tekste shkollore që janë për të vënë duart në kokë. /tesheshi.com/
