Një Esad më sfidues, më besimplotë, është paraqitur në një intervistë për NBC News-in, ku i është përgjigjur një serie të gjatë pyetjesh.
Shefi i regjimit sirian ka shprehur bindjen se lufta mund të fitohet brenda pak muajsh, e se ndërhyrja e Rusisë ka ndihmuar në bërjen përpara drejt fitores.
“Ushtria siriane ka bërë goxha përparim së fundi. Mbështetja ruse për ushtrinë siriane ka qenë vendimtare kundër terroristëve. Ka qenë një faktor kritik,” ka deklaruar Esadi.
Ai e ka ngritur lart marrëdhënien e tij me presidentin rus, duke thënë se ajo është e rrënjosur në vlerat dhe në interesin e përbashkët, që është mposhtja e terroristëve.
Megjithatë, ai ka vënë në pah se rusët nuk kanë diskutuar kurrë me të për një tranzicion politik në Siri. “Vetëm populli sirian e përcakton se kush do të jetë presidenti, kush vjen e kush shkon. Ata kurrë nuk kanë thënë një fjalë të vetme në lidhje me këtë,” duke iu refereruar Putinit dhe Lavrovit.
Ndaj amerikanëve, Esadi është treguar i pakursyer, duke i quajtur ata joseriozë. “Realiteti tregon se që prej fillimit të sulmeve ajrore amerikane, terrorizmi është zgjeruar dhe ka mbizotëruar.”
Beshar Esadi e ka mohuar dhe përdorimin e armëve kimike dhe të bombave fuçi. “Askush nuk ka dhënë ndonjë provë për këtë,” është mbrojtur ai.
Përgjigjja në lidhje me vrasjen e fëmijëve ka qenë e këtillë: “Fushata propagandistike dhe mediatike!”
Në të njëjtën mënyrë ai ka mohuar vënien në shenjë të civilëve. “Ne nuk kemi marrë asnjë vendim për të sulmuar ndonjë zonë që nuk ka terroristë.”
“Unë mbroj vendim tim,” është shprehur Esadi. “Të flasësh për një luftë të pastër ku nuk ka viktima, ku nuk ka civilë e njerëz të pafajshëm të vrarë, kjo nuk ekziston. Askush nuk mund ta bëjë atë. Nuk ka luftë të tillë në botë.” /tesheshi.com/
