Edhe pse është mohuar që shefi i regjimit sirian, njeriu përgjegjës për vrasjen e mijëra njerëzve në vendin e tij, të vuajë nga ndonjë sëmundje e të jetë në gjendje jo të mirë, ende ka zëra për të kundërtën.
E përditshmja turke Yeni Şafak sjell sot fakte të reja që e bëjnë më të besueshme mundësinë që Esadi të jetë duke lënguar.
Sipas kësaj gazete, burimet lokale siriane kanë raportuar se Beshar Esadi është shtruar për katër ditë në Shami Hospital, një spital shtetëror në kryeqytetin sirian.
E përditshmja libaneze pro regjimit sirian, el-Mustakbel, ka raportuar të shtunën se Esadi ishte shtruar në spital dhe se ishte në gjendje kritike.
Një tjetër dëshmi për shëndetin e rrënuar të Esadit vjen nga një emër i njohur i Al Jazeera-s, Fajsal el-Kassim, që në llogarinë e tij në Twitter ka shkruar se presidenti sirian nuk ishte në koma, por kishte zënë ama shtratin.
Yeni Şafak u referohet po ashtu burimeve lokale siriane, që kanë deklaruar: “Beshar Esadi është përfundimisht jo mirë dhe po merr trajtim mjekësor në Damask.”
Si për t’i bërë më të besueshme këto lajme, presidenca siriane i ka mohuar kategorikisht zërat përmes një deklarate në Facebook, ndryshe nga ç’veprohet zakonisht, me përgënjeshtrime në mediat shtetërore. /tesheshi.com/
