Beshar Esad befason: Shteti Islam në Irak u krijua nën mbikëqyrjen e amerikanëve!

Në një intervistë të dhënë për televizionin francez France 2 e të transmetuar të hënën, Beshar Esadi ka mohuar të ketë trupa iraniane në Siri. Në të njëjtën kohë, ai ka pranuar se i ka ftuar luftëtarët e Hezbullahut të luftojnë përkrah regjimit të tij.

Esadi u shpreh po ashtu se zyrtarët francezë të sigurisë kishin patur kontakte me qeverinë siriane në lidhje me ISIS-in.

“Ne e ftuam Hezbullahun, por jo iranianët. Nuk ka trupa iraniane në Siri, dhe ata nuk kanë dërguar asnjë forcë,” u shpreh presidenti sirian për televizionin francez.

Irani është aleati kryesor rajonal i regjimit të Esadit, dhe Teherani e ka pranuar dërgimin e këshilltarëve ushtarakë për t’i ndihmuar forcat e tij në luftën kundër kryengritësve dhe ISIS-it.

Gjithashtu Hezbullahu, grupi shiit libanez, i cili mbështetet nga Irani, e ka ndihmuar Esadin për të fituar terren ndaj rebelëve të ngritur kundër regjimit sirian.

Beshar Esadi i mohoi në të njëjtën kohë sulmet kimike mbi provincën veriperëndimore të Idlibit muajin e shkuar, dhe i akuzoi SHBA-të për mbikëqyrjen e krijimit të ISIS-it.

“Shteti Islam u krijua në Irak në vitin 2006 nën mbikëqyrjen e amerikanëve. IS-i erdhi nga Iraku në Siri sepse kaosi është ngjitës,” qenë fjalët e tij.

Udhëheqësi sirian kritikoi dhe koalicionin e krijuar për të luftuar ISIS-in, duke mos e quajtur serioz atë.

“Nëse krahasoni numrin e sulmeve ajrore të kryera nga koalicioni i përbërë nga 60 shtete me ato të kryera nga shteti ynë i vogël, do të shihni se nganjëherë ne godasim në ditë dhjetë herë më tepër se koalicioni. A është kjo serioze?”

Që nga protestat antiqeveritare të marsit të vitit 2011, të kthyera më pas në një luftë mes regjimit dhe kryengritësve, kanë lënë jetën më tepër se 215.000 njerëz, janë lënduar mijëra të tjerë, e miliona janë shpërngulur. Lufta vijon ende, ndërsa drita në fund të tunelit nuk duket për sirianët. /tesheshi.com/