Lëvizja BESA në Maqedoni ka tentuar t’i vendosë një emër asaj çfarë ndodhi të enjten e 27 prillit në ambientet e kuvendit pas zgjedhjes se Talat Xhaferit kryetar. “E enjtja e përgjakur” e ka cilësuar ajo ngjarjen e rëndë, ku turma përkrahësish të VMRO-së iu turrën deputetëve dhe politkanëve të kahjes tjetër, përfshirë dhe atë shqiptare, duke dhunuar e gjakosur dy sosh: Zoran Zaev dhe Zijadin Sela. Dhe për këtë BESA kërkon hetim të imtësishëm për të vënë para përgjegjësisë ligjore shkaktarët, qoftë dhe me anë të një komisioni hetimor parlamentar.
“Për këtë arsye e ftojmë Prokurorinë Publike që të reflektojë dhe të fillojë me hetimet profesionale të këtij rasti dhe të mos bie pre e ndikimeve nga partitë politike, të cilave u ka shërbyer deri më tani. Po ashtu e ftojmë Ministrinë e Punëve të Brendshme, gjegjësisht ministrin në detyrë, që të fillojë me sanksionimin e punonjësve të policisë, të cilët i ndihmuan bandat e huliganëve, qoftë në aspektin e logjistikës, qoftë edhe në bashkëpjesëmarrjen e tyre në aktet e terrorit të ushtruar ndaj të zgjedhurve të popullit dhe ndaj gazetarëve. Lëvizja BESA, respektivisht grupi parlamentar i saj, do të dorëzojë edhe kërkesë deri te kryetari i sapozgjedhur i Kuvendit të Republikës së Maqedonisë, tashmë i pranuar edhe ndërkombëtarisht, që në seancën e parë të formohet komision hetimor parlamentar, ku do të zbardhet gjithë e vërteta e 27 prillit dhe, mbi atë bazë, të ndërmerren masat e nevojshme për të gjithë ata që kanë qenë të përfshirë në këtë rast”, thuhet në reagimin e BESËS. /tesheshi.com/
