Lëvizja “Besa”, partia më e re e shqiptarëve të Maqedonisë, ka shpalosur platformën politike të quajtur “Ridefinimi” e cila synon të ngrejë një dialog të vërtetë ndërmjet dy komuniteteve shumicë në Maqedoni, maqedonasve dhe shqiptarëve, pa i përjashtuar edhe komunitetet e tjera.
Sipas drejtuesve të “Besës”, kjo vizion vjen natyrshëm si rezultat i mungesës së konsensusit interetnik dhe intraetnik për rregullimin e brendshëm shtetëror, gjë e cila sicc thonë nga kjo parti, pengon realizimin e orientimeve strategjike të vendit, siç është anëtarësimi në NATO dhe BE, ndërsa ka vazhduar të prodhojë kështu krizë të rëndë politike dhe të sigurisë, që e rrezikon të ardhmen dhe perspektivën e vendit.
Për t`u realizuar platforma e tyre, koordinatori I lëvizjes Besa Bilall Kasami, tha se nevojitet një trup i pavarur për dalje nga kjo situatë në këtë përbërje: ambasadorët e akredituar në Shkup nga BE-ja, SHBA-të, Republika e Shqipërisë dhe Republika e Kosovës, një përfaqësues i Akademisë së Shkencave dhe Arteve të Republikës së Maqedonisë, një i Institutit të Trashëgimisë Shpirtërore e Kulturore të Shqiptarëve të Maqedonisë, një i Universitetit Shtetëror të Tetovës dhe një i Universitetit “Shën Cirili e Metodi” – Shkup – të gjithë këta në rolin e vëzhguesve dhe lehtësuesve të dialogut, ndërsa në anën tjetër, në rolin e propozuesve dhe vendimmarrësve, të jenë liderët e partive më të mëdha në vend, të cilët përmes dialogut dhe konsensusit do të propozojnë një mandatar ekspert, i cili për një afat të caktuar do të formojë një kabinet qeveritar po ashtu me ekspertë.
Pas miratimit të atij kabineti, që do të jetë me mandat një deri në dyvjeçar, ajo qeveri do të krijojë parakushte për kthimin e besimit dhe përgatitjen e zgjedhjeve të parakohshme.
Lëvizja BESA propozon që detyrat e kësaj qeverie të jenë:
- Regjistrimi i popullsisë me mbikëqyrje ndërkombëtare;
- Ndryshimi i ligjit për zgjedhje, pastrimi i listës zgjedhore dhe organizimi i zgjedhjeve të ardhshme me monitorim të fuqishëm ndërkombëtar;
- Themelimi i Prokurorisë Speciale të pavarur me prokurorë eminentë ndërkombëtare dhe të vendit, për hetimin e hipotekave të deritanishme në bazë të materialeve të LSDM-së dhe akuzave të VMRO-DPMNE-së për puç.
- Themelimi i Gjykatës Speciale të pavarur me gjykatës eminentë ndërkombëtarë dhe të vendit, për gjykimin e rasteve të ngritura nga Prokuroria Speciale.
- Themelimi i një bordi të ri drejtues të RTVM-së nga ekspertë eminentë të vendit dhe ndërkombëtarë për të krijuar hapësirë të balancuar në mediume të të gjithë faktorëve relevantë politikë në Maqedoni. /tesheshi.com/
