Lëvizja BESA vendosi që përfundimisht të mos hyjë në qeverinë e re maqedonase të Zavit.
“BESA njofton se ajo nuk do të jetë pjesë e qeverisë së ardhshme. Mandatari nuk ishte i gatshëm të pranoj dhe të nënshkruaj parimet e BESËS. BESA do të mbetet një faktor konstruktiv politik në Maqedoni, duke u bërë gardian i interesave të shqiptarëve. E njoftojmë opinioni se BESA do të mbështesë çdo nisëm në interes të veçantë të shqiptarëve dhe të shtetit”, tha kreu i Lëvizjes, Bilal Kasami.
Ky gjest është parë si një tjetër hap i drejtë në funksion të ofrimit të një politike me parime.
“Detyra jona akoma nuk ka përfunduar. BESA sot dëshmoi se mbetet në anën e shqiptarëve dhe qytetarëve të tjerë. Votuesi shumë shpejtë do të vërej këtë dhe në zgjedhjet e ardhshme regjimi do të përfundojë plotësisht”, tha Kasami, duke aluduar qartë në BDI-në e Ali Ahmetit.
“Nëse Zaev mendon se mund të bëjë reforma me njerëz të propozuar nga BDI, ne dyshojmë se një qeveri e tillë mund të jetë reformatore”, shtoi Kasami.
Ky akt i BESËS ka marrë mbështetje nga zëri më i fuqishëm i mendimit shqiptar në Maqedoni, Kim Mehmeti.
“Lëvizja Besa sot më ka bërë të ndjehem mburrshëm: u tregoi sunduesve maqedonas se ka arritur gjenerata e politikanëve shqiptarë që sheh edhe përtej ambicieve personale dhe që, të mirën e popullit nuk e barazojnë me punësimin e tyre si burrështetas, pa pasur shtet! Pra i treguan edhe LSDM’së – njësoj si deri dje VMRO-DPMNE’së- se nuk mundet Maqedonia të drejtohet sipas parimit se vetëm shqiptari i korruptueshëm është i dobishëm për shtetin! Andaj edhe sikur të mos arrijnë asgjë më shumë se kaq, BESAtarët duhet të mburren me të vërtetën se janë të parët që treguan se, jo çdo shqiptarë shitet për një post ministror!”, reagoi menjëherë Mehmeti, sapo BESA shpalli “Jo”-në e saj për qeverinë. /tesheshi.com/
