Pas paralajmërimeve mediatike se kryetari i BDI-së së shpejti do të vizitojë qytetin e Kumanovës, ndaj kësaj ka reaguar ashpër dega e Lëvizjes Besa-Kumanovë. Sipas tyre, ardhja eventuale e Ahmetit në Kumanovë do të paraqiste provokim si për të gjallët por edhe për luftarët e rënë në betejën e “Lagjes së Trimave”. Më poshtë mund të lexoni reagimin e plotë:
“Drejtuar, kryetarit të BDI-së, Ali Ahmeti (Të cilin pas 9 dhe 10 majit 2015, nuk mund ta quajmë zotëri) Po të kishit ardhur në Kumanovë më 9 ose 10 maj, Kumanova sot do të ju priste si hero. Mirëpo, ju në vend se të vini në Kumanovë, më 9 maj të vitit 2015, zgjodhët të qëndroni bashkë me Artan Grubin edhe atë që nga ora 5 e mëngjesit (kështu thotë vetë Grubi). Datat 9 dhe 10 maj, ishin datat kur ju patët rastin të pozicionoheni: A jeni me Kumanovën apo kundër?. Për fat të keq, ju zgjodhët anën e cila nuk ju jep të drejtën morale që sot të vizitoni qytetin tonë si lider shqiptar. Ju mund të vini në Kumanovë, nëse ua çel rrugën makineria, e cila më 9 dhe 10 maj, e rrënoi “Lagjen e Trimave” në Kumanovë. Mirëpo, çdo ardhje e juaj në qytetin tonë, paraqet provokim për ata që përjetuan golgotën e majit të vitit të kaluar, derisa ju e “menaxhonit” situatën nga kolltukët e butë në Reçicë të Vogël. Kumanovarët ua bënë shumë qartë me dije, se nuk jeni të dëshiruar. Për këtë arsye, kemi frikë se ardhja juaj tani në Kumanovë, mund të simbolizojë triumf të tradhtisë mbi atdhedashurinë. Kemi frikë se ardhja juaj në qytetin tonë, nuk do të shqetësojë vetëm të gjallët, por do të shqetësojë edhe Mirsadin, Begun, Xhaferin… edhe shokët e tyre, që ranë në Kumanovë. Do të shqetësojë edhe Komandant Shqiponjën. Kumanova ende ka dhimbje. Mos na shkaktoni dhimbje të reja. Nëse keni pak njerëzi, sepse (mos)respektin ndaj Kumanovës moti e keni treguar, ju lutemi lëreni të qetë kësaj radhe qytetin tonë!
Lëvizja BESA – Dega në Kumanovë”
/tesheshi.com/
