Monstra, Lagjja e Trimave, aferat e ndryshme korruptive dhe së fundi bisedat e nxehta erotike të funksionarëve të lartë të Bashkimit Demokratik për Integrim, si duket kanë ndikuar aq shumë në rënien drastike të mbështetjes së BDI-së nga popullata shqiptare në Maqedoni.
Në anketat e fundit të realizuara nga organizata joqeveritare dhe media të ndryshme në Maqedoni se cila parti do të shpallej fituese nëse organizohen zgjedhjet e parakohshme parlamentare, për të satën herë BDI renditet e treta ose e katërta.
Kështu, edhe në sondazhin e fundit të agjencisë së lajmeve në Maqedoni, INA, BDI renditet e katërta.
Ajo që bie në sy është renditja e lëvizjes BESA si një forcë e re në politikbërjen shqiptare të Maqedonisë në krye të çdo sondazhi.
Anketa e INA-s ishte e hapur disa javë, ku në pyetjen “Cila parti mendoni se do të fitoj në zgjedhje” votuan mbi 6 mijë lexues, prej tyre 1759 për lëvizjen BESA, rreth 1400 për LR-PDSH, 905 për PDSH, rreth 879 për BDI, 432 Uniteti, dhe 289 për RDK-në.
Ndryshe, anketa sipas agjencisë së lajmeve INA është dizajnuar në atë mënyrë që pamundëson votimin e shumëfishtë. M. Krasniqi – /tesheshi.com/
