Lëvizja BESA me gjasë do jetë pjesë e koalicionit qeveritar të Zoran Zaev. Pas disa zhvillimeve të trazuara në këtë parti, ku tashmë në krye si kryetar të ri ka Afrim Gashin, BESA mund t’i bashkangjitet trenit qeveritar duke marrë ndoca vagonë si përgjegjësi qeverisëse.
Për këtë arsye, kryeministri Zaev dhe kryetari Gashi patën një takim mes tyre, duke paralajmëruar se marsi do jetë muaji kur do vendoset mbi hyrjen e Besës në qeveri.
“Në përgjithësi u dakorduam që brenda muajit mars të fillojnë negociatat që edhe BESA të jetë pjesë e shumicës parlamentare, por mbetet të shohim në vazhdim se si do të rrjedh ky proces. Por kryeministri ishte optimist se mund të arrihet ky qëllim. Edhe ne kemi shfaqur gatishmëri që të ndihmojmë këtë proces, të shohim se si do të rrjedhin gjërat më tutje. Nuk kemi folur konkretisht për gjërat konkrete por për gatishmërinë dhe nevojën se qeveria është mirë të zgjerohet ndërsa shumica parlamentare të jetë më stabile”, tha Gashi pas takimit.
Besa nuk pranoi të hyjë në koalicion pas zgjedhjeve të dhjetorit 2016, ku arriti një rezultat suprizues, duke preferuar të bëjë opozitën edhe ndaj Zaevit. Mirëpo zëra brenda saj e kanë konsideruar këtë si gabim fatal që më pas çoi dhe në disfatë në zgjedhjet lokale. /tesheshi.com/
