Refuzohen të gjitha ankesat e Lëvizjes BESA drejtuar Komisionit Shtetëror Zgjedhor mbi parregullsitë zgjedhore, duke e lënë pa mandatin e 6 të pretenduar.
6 anëtarë të KSHZ-së, përfshirë këtu ata të BDI-së dhe PDSH-së, Subhi Jakupi dhe Bedredin Ibrahimi, kanë votuar kundër ankesave të BESËS mbi falsifikimin e procesverbaleve nga ana e VMRO-DPMNE-së.
Ndaj këtij vendimi ka reaguar menjëherë Zeqirija Ibrahimi, një ndër drejtuesit e BESËS.
“Edhe sot vazhdon argatllëku për VMRO-në…
Shqiptarëve sot u rrezikohet një deputet për shkak se argatët shqiptarë të VMRO-së në KSHZ janë të angazhuar t’i luftojnë shqiptarët dhe ta mbrojnë VMRO-në.
Më vjen keq që edhe ata e quajnë veten shqiptarë! Turp!”, shkroi Ibrahimi në FB.
Reagim pati dhe nga anëtari i kryesisë qendrore, Zejd Rexhepi, i cili zgjodhi të ngushëlloje kandidatin për deputet në njësinë zgjedhore numër 2, Admirim Halitin, pikërisht atë që duhet ta merrte mandatin e mohuar, në një formë mjaft origjinale.
“I nderuar miku im Admirim. Me padrejtësi t’u morr e drejta që të përfaqësosh Kumanovën në kuvendin e këtij shteti pa emër.
Por, sakrifica yte i nxorri në shesh tradhëtitë kombëtare të vasalëve të shkaut BDI-PDSH.
Populli im i përvuajtur, duro edhe disa muaj se fëlliqësirat kombëtare do të shkojnë në bërllogun historik”, ka shkruar Zejd Rexhepi.
Kujtojmë se lideri i Bashkimit Demokratik për Integrim, Ali Ahmeti pas shpalljes së rezultateve nga zgjedhjet e parakohëshme parlamentare para 4 ditësh i akuzoi ata shqiptarë të cilët i kanë dhënë votën partisë maqedonase, LSDM, dhe si pasojë shqiptarët kësaj rradhe në kuvend do të përfaqësohen vetëm me 20 deputetë. Ndërsa sot, përfaqësues i BDI-së në KSHZ votoi kundër që Lëvizja BESA të fitojë edhe një deputet më shumë. Kështu nuk do ishte dëmtuar BDI por VMRO, ngaqë këta të fundit kanë falsifikuar procesverbalet vetëm që të krijojnë avantazh të deputetëve ndaj LSDM-së opozitare.
Në ndërkohë KSHZ po shqyrtojnë ankesat e LSDM-së, të cilët pretendojnë së paku të barazojnë numrin e deputetëve me VMRO-në, në 50-50.
Ndryshe për momentin VMRO ka gjithsej 51 deputetë, LSDM 49, BDI 10, Lëvizja BESA 5, Aleanca për Shqiptarët 3, dhe PDSH 2 deputetë. /tesheshi.com/
