Federata e Paqes Universale -Konferenca e Lidershipit Evropian mbajti në Tiranë më 21-22 nëntor takimin rajonal: Iniciativa e Ballkanit për Paqe me temën “Mirëkuptimi i ndërsjellë & Bashkëpunimi për paqe.
Në konferencë në nivel ish-presidentësh të shteteve të rajonit, personaliteteve të shquara të jetës akademike, politike, fetare dhe ndërfetare u trajtuan çështje të rëndësishme për paqen dhe prosperitetin në rajon. Aktivistë të shumtë prezantuan studimet e tyre.
Fjalimi i prof. Besa Ismaili Ahmeti ishte i fokusuar në ‘Agjencinë (aktivizimin udhëheqës) të grave në dialogun ndërfetar në Kosovë’
‘Dialogu ndërfetar mbetet përgjithësisht fusha më pak e mbështetur, ndërsa ajo e grave në veçanti me zero mbështetje, kur krahasojmë investimet e mëdha që bëhen për të shkaktuar ndasi, urrejtje dhe trazira mes popujve dhe feve’ – deklaroi ajo, dhe vazhdoi –‘ Dialogu ndërfetar sot më shumë se kurrë është platforma nga e cila suksesshëm vepron lufta kundër ekstremizmave, stereotipave dhe paragjykimeve, prandaj edhe duhet mbështetur akoma më tepër’.
Gjatë seancës për fuqizimin e grave si paqe ndërtuese, gjatë panelit të veçantë të kësaj konference, prof. Besa Ismaili shtoi se: ‘ Dialogu ndërfetar i grave si platformë u ka mundësuar grave të komuniteteve fetare të fuqizojnë edhe më pozicionet e tyre brenda vet komuniteteve të tyre fetare, duke shtuar kështu dukshmërinë e kontributeve të tyre. Gratë e feve vazhdojnë të japin kontributin e tyre të pazëvendësueshëm në ndërtimin e paqes dhe mbjelljen e dashurisë dhe respektit të ndërsjellë mes njerëzve. Ato kanë arritur atje ku shumë të tjerë kanë dështuar: në thyerjen e mureve të mosnjohjes, të izolimit dhe të paragjykimit mes njerëzve në Kosovë’.
“Është koha e duhur që dialogu ndërfetare të ngritet në nivel më të lartë: nga ai ceremonial dhe punës në terren në atë të nivelit akademik. Që të futet në kurrikulat shkollore dhe kampuset e universiteteve. Dhe në këtë drejtim Fakulteti i Studimeve Islame posedon bagazhin e duhur akademik dhe vullnetin që të jetë lidere në rajon në vendosjen e urave të bashkëpunimit me botën akademike”, u tha në fund të fjalimit të saj, çfarë edhe u mirëprit si ide nga përfaqësues të ndryshëm universitetesh e institutesh ndërkombëtare.
Federata e Paqes Universale në përmbyllje të Konferencës shpalli prof. Besa Ismaili Ahmeti, prodekane në Fakultetin e Studimeve Islame – Ambasadore për Paqe për kontributin e saj të deritanishëm dhe të ardhshem në ndërtimin e paqes.
Çmimin ia dorëzoi znj. Yeon Ah Choi Moon, Presidente Ndërkombëtare e Federatës së Grave për Paqe Universale dhe Zhak Marion Sekretar Gjeneral për UPF Evropë në prani të ish-Presidentit të Republikës së Kosovës, z. Fatmir Sejdiut dhe ish-Presidentit të Shqipërisë,z. Alfred Moisiut. /tesheshi.com/
