Nga Blendi Gashi
Bekim Çollaku, siç edhe shumë politikanë tjerë shqiptarë, nuk mban premtimet që bën, duke i dhënë “besës emblematike shqiptare” një goditje të rëndë.
Ai sot edhe zyrtarisht u kthye në folenë e vjetër, pra në punën si këshilltar i Hashim Thaçit, presidentit aktual, pasi siç dihet edhe më parë Çollaku ka mbajtur pozitën e këshilltarit politik sa Thaçi mbante pozitën e kryeministrit.
Çollaku në një konferencë për media që organizoi sot, në vend se të jap lajmin e shumëpritur nga qytetarët për premtimin që bëri me dhjetëra herë, se hiqen vizat për Kosovën, ai bëri një deklarim që edhe është pritur, foli para gazetarëve për pozitën e re që do marrë, pra për rehatinë e radhës që do ketë, tashmë në Presidencë.
Megjithatë, Çollaku në vend se të tregohet i drejtë dhe të thotë se largohet nga pozita e ministrit të Integrimeve Evropiane se premtimi i tij me gjasë nuk do realizohet sivjet, ai për më tepër bëri një deklarim aq skandaloz sa që fajësoi Bashkimin Evropian për mos dhënien e liberalizimit të vizave.
Por, siç është në dijeni Çollaku, BE është deklaruar së fundmi se vizat hiqen kur të përmbushen dy pikat kryesore, luftimi i korrupsioni dhe krimit të organizuar që po e gërrygen vendin por edhe një kriter tjetër është edhe ratifikimi i Demarkacionit me Malin e Zi.
“Nuk po largohem si njëri që nuk ka arritur ti realizoj objektivat, përkundrazi dy objektivat të mia si ministër i Integrimit ka qenë nënshkrimi i MSA-së dhe hyrjes së saj në fuqi dhe e dyta ka qenë procesi i përfundimit për liberalizmin e vizave, ku detyra ime ka qenë që ti përmbushim kriteret dhe kjo është arritur, kriteri i dytë është ratifikimi i demarkacionit dhe këtu unë nuk kam ndikim sepse nuk kam të drejtë vote, e as ndikim tek deputetët”, ka thënë Çollaku.
Çollaku, ky dezertor që i lë punët në gjysmë…
Por, për hirë të opinionit publik duhet bërë me dije se Çollaku në konferencën e sotme tha disa të pavërteta dhe manipuloi me qytetarët, ku mbi të gjitha ai nuk tregoi arsyen e vërtetë pse po kthehet nën krahët e Thaçit, njeriu që e ngriti në nivelet më të larta Çollakun.
Çollaku sot në konferencë është dashur të shpjegojë pse nuk e mbajti premtimin e dhënë më 21 prill të këtij viti ku në emisionin “Politikë” në televizionin “Tribuna Channel”, deklaroi se nuk do ta lë punën e ministrit të Integrimeve për të shkuar në Presidencë.
Ai përafërsisht para pesë muajsh deklaroi se nuk do ta lë punën përgjysmë, por do të punojë për liberalizimin e vizave.
“Unë mund të ju them me seriozitetin më të madh se unë nuk njihem si dezertor që i lë punët përgjysmë dhe shkoj diku ku e kam më lehte në asnjë mënyre. Një gjë që e marr përsipër e çojë deri në fund dhe nuk negocioj më përmbushjen e asaj detyre. Dy detyra i kam pasur kryesore nga marrja e mandatit si ministër i Integrimit Evropian: Nënshkrimin e MSA-së dhe përfundimin e dialogut për procesin e liberalizimit të vizave. E para është kryer vitin e kaluar kjo e dyta jam i sigurt qe do të kryhet gjatë këtij viti dhe kur kjo të kryhet atëherë mund të mendoj për karrierën time”, deklaroi Çollaku para afër pesë muajsh.
Por, pas kësaj kohe ai, shkeli këtë premtim dhe i gëzuar në conference për media tregoi se po i bashkohet Thaçit në Presidencë por nuk foli pse nuk e mbajti premtimin e dhënë se nuk do të lë punën si ministër deri të liberalizohen vizat.
Padyshim, si shumica e politikanëve në Kosovë, edhe Bekim Çollaku me veprimin e bërë tregoi se ai së pari mendon për veten dhe karrierën e tij, se për shtetin.
Andaj, Çollaku me veprimin e tij zgjedhi të rehatohet në Presidencë dhe t’i shkoj pas Thaçit, dhe të mos lodhet më nëse qytetarëve do ju hiqen apo jo vizat.
Ndoshta, edhe kjo nuk ka qenë asnjëherë brenga e vërtetë e Çollakut.
Ai mund të jetë bërë ministër i Integrimeve nga Thaçi me gjasë se është menduar që liberalizimi do të ndodh këtë vit, dhe i përkëdheliuri i tij, Çollaku do mbetet një “hero”, por jo nuk ndodhi.
Dhe, me gjasë ka menduar më mirë të largohet me dëshirë se në fund të vitit t’i kërkohet largimi për shkak të gënjimit të vazhdueshëm që ju bëri qytetarëve se vizat do të hiqen më 2016-të. /tesheshi.com/
