Lëvizja BESA dyshon se zgjedhjet e afërta në Maqedoni, ato të prillit, do mund të jenë sipas standarteve, derisa ato janë në dorë të atyre, që siç shprehet BESA, shkelin pa asnjë problem marrëveshjet e nënshkruara.
“Meqë palët nënshkruese të Marrëveshjes së Përzhinos vazhdojnë t’i shkelin afatet, qoftë në fushën e pikave që kanë të bëjnë me mediat, ato që janë të lidhura me listën zgjedhore dhe në përgjithësi me procesin zgjedhor, por edhe në pikën e dorëheqjes së kryeministrit Gruevski”, thuhet në një deklaratë të lëvizjes në fjalë.
Sipas saj, duke luajtur rolin e nxënësve grindavecë, të cilën vazhdojnë të grinden sapo e kthen kokën arsimtari, edhe këto parti sillen ndaj asistuesve ndërkombëtarë me sabotim dhe prepotencë.
Lëvizja BESA institon që ndërkombëtarët të ushtrojnë akoma më shumë presion ndaj pushtetit në Maqedoni që Marrëveshja e Përzhinos e 2 qershorit, të implementohet tërësisht, e që zgjedhjet e pritshme të jenë në standartet e kërkuara. Përndryshe ajo paralajmëron thirrje për bojkot.
“Sepse nuk ka asnjë kuptim që të shpresojmë për zgjedhje të lira dhe demokratike nëse ato organizohen nga njerëzit e njëjtë dhe me mundësinë e njëjtë të manipulimeve”, thuhet më tej në deklaratën e Lëvizjes BESA. /tesheshi.com/
