Banka Evropiane për Rindërtim dhe Zhvillim (EBRD) parashikon që ekonomitë në rajonet ku ajo është aktive do të regjistrojnë një rënie mesatare prej 3.5 përqind këtë vit, për shkak të ndikimit ekonomik të pandemisë së re të koronavirusit, dhe se vitin e ardhshëm do të rriten me 4,1 përqind
Bosnja, Maqedonia Veriore dhe Serbia pritet të vuajnë pasojat e ndërprerjeve në zinxhirët e furnizimit global në Ballkanin Perëndimor, e kjo për shkak të bazave të tyre të forta të prodhimit, sipas edicionit të ri të Perspektivave Ekonomike Rajonale të EBRD.
Shërimi, shton EBRD, do të varet nga lehtësimi gradual i masave për luftimin e virusit dhe kthimi i biznesit në normalitet gjatë gjysmës së dytë të vitit.
Ekonomitë e Shqipërisë dhe Malit të Zi do të preken nga rënia e turizmit, ndërsa ekonomia e Kosovës dhe disa ekonomi të tjera në rajon do të preken nga rënia e dërgesave, të cilat do të ulin kërkesën e brendshme.
Në mars, raportohet se ardhjet turistike ranë me 75 deri në 80 përqind në krahasim me të njëjtën periudhë të vitit të kaluar, një rënie e ngjashme pritet në tremujorin e dytë, dhe në të tretin rënia do arrijë afro 30 përqind.
Raporti paralajmëron se këto parashikime janë subjekt i ndryshimeve për shkak të “pasigurive të pashembullta”.
“Nëse masat për distancimin social mbeten në vend shumë më gjatë se sa parashikohet, recesioni mund të jetë shumë më i thellë, dhe nivelet e PBB-së për frymë 2019 nuk do të arrihen me vite,” thuhet në dokument.
Vihet re gjithashtu se në të gjitha rajonet e BERZH-it, masat e qeverisë për të luftuar koronavirusin kanë ndikuar në ofertën dhe kërkesën e brendshme dhe se ekonomitë vuajnë nga tronditjet e jashtme, siç janë një rënie e mprehtë e çmimeve të mallrave, presion ndaj eksportuesve, prishje e zinxhirëve të vlerës globale, kolaps turizmi etj.
Ekspertja e EBRD Beata Javorcik beson se ndërsa bota del nga kriza, është thelbësore që vendet e rajonit të përqendrohen në bashkëpunimin e ardhshëm dhe forcimin e rezistencës ekonomike.
“Kriza ka qenë një goditje e madhe dhe dalja nga ajo do të jetë po aq sfiduese. Kjo nuk është një kohë për nacionalizëm ekonomik dhe proteksionizëm, por një kohë për të formuar një të ardhme më të mirë përmes angazhimit ndërkombëtar për tregtinë e lirë, zbutjen e ndryshimeve klimatike dhe bashkëpunimin ekonomik”, tha ajo. /tesheshi.com/
