Nga Saimir Sula, Uashington
Shtetet e Bashkuara të Amerikës dhe Koreja e Veriut janë përfshirë tashmë në një luftë fjalësh, që nuk i dihet se si do të përfundojë, dhe aktorët kryesorë të kësaj lufte fjalësh janë liderët e dy vendeve, Donald Trump dhe Kim Jong Un. Pas fjalimit të fortë të Trump në Asamblenë e Përgjithshme të Organizatës së Kombeve të Bashkuara, ku tha se do ta shkatërronte krejtësisht shtetin komunist, nëse këta të fundit sulmojnë territorin amerikan apo aleatët e Amerikës, reagon edhe Kim Jong Un. Përmes një deklarate të publikuar nga mediat shtetërore, ai e ka cilësuar çmenduri deklaratën e Trump për shkatërrimin e Koresë së Veriut, çmenduri që sipas Kim Jong Un, SHBA do të paguajë shtrenjtë. Ndërsa ministri i Jashtëm koreanoverior paralajmëroi se Peniani mund të testojë një armë të fuqishme me hidrogjen në Oqeanin Paqësor, në përgjigje të kërcenimeve të Trump për veprime ushtarake.
Pak më herët, kreu i Shtëpisë së Bardhë njoftoi vendosjen e sanksioneve të reja financiare ndaj shtetit diktatorial. I shoqëruar nga Presidenti i Koresë së Jugut dhe kryeministri i Japonisë, si për të dëshmuar mbështetjen që SHBA u jep vendeve aleate të atij rajoni, që është më i rrezikuari nga çmenduritë e mundshme të Kim Jong Un, Trump lajmëroi masat e reja. Sanksionet amerikane janë financiare dhe kanë në shenjestër Korenë e Veriut dhe kompanitë e huaja apo individët që bëjnë biznes me “shtetin batakçi”, siç e cilësoi Trump. Urdhëri i tij ekzekutiv i jep Departamentit amerikan të Thesarit autoritet shtesë, që sipas Trump do të ndihmojë në ndërprerjen e tregtisë ndërkombëtare dhe financiare që regjimi i diktatorit Kim Jong Un përdor për të mbështetur programin e ndaluar të armëve bërthamore.
“Programi bërthamor i Koresë së Veriut është një kërcënim i madh i paqes dhe sigurisë në botën tonë dhe është e papranueshme që këtij regjimi kriminal dhe batakçi të tjerët i japin mbështetje financiare”, – deklaroi Trump gjatë takimit me liderët koreanë dhe japonezë. Ai shtoi se SHBA do të vijojë të kërkojë çarmatimin e plotë bërthamor të Koresë së Veriut.
Në një mënyrë shumë domethënëse Trump u shpreh gjithashtu se Presidenti i Kinës Xi Jinping ka urdhëruar bankat kineze që të ndërpresin marrëdhëniet me entitetet koreanoveriore, duke e cilësuar këtë lëvizje si tepër të guximshme dhe befasuese. Kina është partneri kryesor ekonomik i Koresë së Veriut. Rreth 90 për qund e aktivitetit ekonomik të Koresë së Veriut përfshin Kinën. Entitetet kineze janë udha kryesore për transaksionet financiare tepër të kufizuara të Penianit zyrtar në ekonominë botërore. Kina dyshohet gjithashtu se ka bërë një sy qorr ndaj disa veprimeve kontrabandë dhe thyerje sanksionesh, duke e lejuar shtetin koreanoverior që të zhvillojë në mënyrë të shpejtë raketat me rreze të gjatë veprimi, pavarësisht se komuniteti ndërkombëtar ia ka ndaluar pjesë të nevojshme për ndërtimin e raketave dhe teknologjinë.
Roli i Kinës është jetik në këtë process. Të gjitha sanksionet e OKB-së duhet të pranohen edhe nga Kina, e cila ka të drejtën e vetos, si anëtare e përhershme e Këshillit të Sigurimit. Vullneti i shprehur së fundmi nga Pekini zyrtar për të ndëshkuar vendin mik komunist jep shenja të forta të mosmiratimit të provokimeve ndërkombëtare të bëra nga Koreja e Veriut. Megjithatë, si Kina, ashtu edhe vendi tjetër anëtar i përhershëm i Këshillit të Sigurimit të OKB-së, Rusia, kanë kundërshtuar disa nga masat më të ashpra ekonimike që mund t’i vendosen Koresë së Veriut, sic është frenimi i plotë banker, që do të prekte institucione financiare kineze e më gjërë.
Javët e fundit, Këshilli i Sigurimit të OKB-së ka miratuar dy raunde sanksionesh ekonomike dhe ka lënë hapësirë edhe për më tepër ndëshkime. Sanksionet kufizojnë importet e naftës për Korenë e Veriut, por nuk vendosin embargo të plotë, ashtu siç ka sugjeruar SHBA. Administrata e Trump ka lënë të kuptohet gjithashtu se dëshiron një ndalim të plotë të praktiës së dërgimit jashtë vendit të punëtorëve koreanoveriorë për pagesa më të mëdha, të vilat shkojnë shpesh në arkat e qeverisë në Penian. /tesheshi.com/
