“Hillary Clinton duhet të bëhet presidentja e ardhshme e Shteteve të Bashkuara.” Ky ishte kulmi i fjalës së senatorit të Vermontit, Bernie Sanders, në koventën kombëtare të demokratëve amerikanë në Filadelfia.
Mes një pritjeje të ngrohtë dhe duartrokitjeve që do të zgjasnin për tre minuta, Bernie Sanders u ngjit në podiumin e konventës për t’i dhënë mbështetje kundërshtares kryesore në fushatën brenda partisë për zgjedhjen e kandidatit presidencial.
“E kuptoj se shumë njerëz këtu, në këtë sallë konvente, dhe anekënd vendit janë të zhgënjyer për rezultatet përfundimtare të procesit të kandidimit. Mendoj se është e ndershme të them se askush nuk është më shumë i zhgënjyer se unë. Por të gjithë mbështetësit tanë duhet të krenohen me arritjen historike që kemi realizuar,” u tha ai pjesëmarrësve në konventë.
Ai u ka kërkuar të pranishmëve unitet, në kërkim të një fitoreje në zgjedhjet presidenciale të nëntorit të këtij viti.
Sanders ka rezervuar dhe disa fjalë për gjuhën e përdorur nga kandidati republikan Donald Trump gjatë fushatës, gjithnjë duke kërkuar mbështetjen e Hillary Clinton-it: “Ne kemi nevojë për udhëheqje që ta bashkojë popullin tonë, që të na bëjë më të fortë, e jo udhëheqje që i fyen latinët dhe meksikanët, që i fyen muslimanët dhe femrat, afroamerikanët dhe veteranët, dhe që kërkon të na ndajë.”
Pavarësisht fjalës së tij, në konventë është dalluar qartë një pakënaqësi e mbështetësve të Sanders-it ndaj ish-rivales Clinton. /tesheshi.com/
