Ish-kryeadministratori i parë i OKB-së në Kosovë, francezi Bernard Kouchner, është përpjekur ta zbusë disi panoramën e trishtë të gjendjes në Kosovën e pasluftës, sidomos atë që ka të bëjë me krimet e luftës e raportet ndëretnike. Duke folur pas marrjes së titullit “Honoris Causa” nga Universiteti Europian i Tiranës, Kouchner tha:
“A e dini se, për krimet e Luftës së Dytë Botërore në vendin tim nuk është vendosur ende, edhe 70 vite pas luftës?! Ndaj, edhe për Kosovën nuk është një situatë e përkryer. Por, nëse historianët apo gjykatësit do të qartësojnë më shumë se çfarë ka ndodhur gjatë luftës, kjo është një gjë e mirë. Thashë që kjo nuk është një situatë e përkryer, mrekullitë nuk zbresin nga qielli. Përgjithësisht OKB-ja nuk mburret me histori suksesi, por Kosova ishte një e tillë”.
Më tej, ai ka përdorur tezën krahasuese, për të përcjellë idene se sidoqoftë, Kosova përbën një model pozitiv…krahasuar me katrahurën e Lindjes së Mesme:
“Unë vendosa mundësinë e paqes dhe kjo është një kohë paqeje. Sigurisht ka tensione, ka në Mitrovicë në urën e Ibrit, por nuk mund të shkatërrosh që të shpëtosh nga urrejtja. Kjo kërkon kohë, një, dy apo 3 breza. Më vjen keq, por e kam parë këtë kudo në botë. Lufta është e tmerrshme. Vuajtjet po ashtu. Ndaj është më mirë të luftosh për paqen, sesa për luftën. Unë them që Kosova është përmirësuar. Serbët vizitojnë manastiret. Nuk është e lehtë, por është e mundur. Po e shohim ç’po ndodh në Lindjen e Mesme. Ndaj Kosova ishte shembulli i zgjidhjes më të mirë”, deklaroi më tej Kouchner. /tesheshi.com/
