Silvio Berluskoni ndihet i keqardhur për Milanin dhe ka kritika për disa gjëra.
Ish presidenti i klubit kuqezi, në një intervistë dhënë për “Corriere della Sera”, ka folur pa dorashka, edhe për pronarët e rinj aziatikë të Milanit. “Milani është pjesë e zemrës dhe jetës sime.
Dëshiroj vetëm që skuadra të ecë mirë, por kjo nuk po ndodh, e për këtë ndihem shumë keq”, është shprehur Berluskoni.
Ish-presidenti nuk i ka kursyer fjalët kritike për fushatën e blerjeve që Milan bëri, si edhe filozofinë mbi të cilën u zhvillua kjo fushatë.
“Nuk e kam kuptuar këtë fushatë blerjesh. Nuk ishte parë kurrë që një skuadër të ndryshojë 11 lojtarë. Me gjithë ato para në dispozicion, mund të blihej një top player”- ka vijuar Berluskoni. Pasi ka rrëfyer mardhënien e pandarë me futbollin dhe Milanin “e tij historik”, ish-numri një i këtij klubi, u shpreh me rezerva edhe për zgjedhjen e Montelës si trajner.
“Doja që në krye të pankinës të qëndronte Broki. Por në atë kohë isha shtruar në spital, e isha mes jetës e vdekjes, e nuk mund të merrja vendime, ndaj pranova atë që më sugjeruan për Montelën”, ka treguar Berluskoni.
Por Silvio i famshëm ka shumë pikpyetje për zgjedhjet që ka bërë trajneri i Milanit.
“Më thoni si mund të përfundojnë në stolin e rezervave, Suso apo Bonaventura, që janë lojtarët më teknikë që Milani ka. Përvec kësaj, si mund të marrë shiritin e kapitenit, një lojtar që ka qenë flamuri i Juventusit, si Bonuci, kur aty është Montolivo dhe fare mirë mund t’i jepej atij shiriti i kapitenit”, përfundon opinioni i Silvio Berluskonit. /tesheshi.com/
