Berisha zhyt Bashën në konspiracion: luftë 11-ës me një 18-të!

Kryedemokrati Basha ka ndërmarrë një hap të befasishëm, si një lëvizje taktike në duelin me Berishën, ku, pasi ia quan këtij të fundit “miting” Kuvendin e pretenduar Kombëtar të thirrur më 11 dhjetor, e thërret një të tillë më 18 dhjetor.

Dhe këtë e bën duke ushqyer një teori konspirative, me elementë fanta politikë.

Në mbledhjen e Kryesisë së PD-së, ai ka komentuar e shpallur më pas:

“Për disa vendime të mijat, në pamje të parë, mund të duket se i turbullojnë demokratët, mund edhe t’ja arrini për një kohë të shkurtër, por demokratët kanë mencurinë për të dalluar të keqen nga e mira, për të dalluar ata që bëjnë sikur luftojnë, dhe ata që vërtetë janë në betejë me regjimin e Edi Ramës.

Çfarë pune ka me PD, por nëse doni edhe me Sali Berishën, Qifja, Suel Çela, Rrahman Rraja, Tom Doshi?

Shumë njerëz, jo vetëm demokratët pyesin: Ç’ne këta me Kuvendin e Partisë Demokratike, pse kaq të investuar këta për një akt të tillë?

Shpjegimi është i thjeshtë: Disa duan të jenë faktorë në PD dhe të vijojnë aferat e tyre korruptive  e kriminale me PD-në siç kanë bërë e bëjnë me PS e Ramës.

Disa të tjerë, që presin të shpallen ‘non grata’, u intereson kjo perplasje për të mbrojtur veten e tyre.

Të gjithë këta që përmenda në një formë a tjetër janë njerëzit e Ramës, i shërbejnë vetëm Ramës, nuk vrasin mendjen as shqetësohen që demokratët janë pa bukë, janë nën presionin e pushtetit, janë pa punë.

U ka shkelur syrin Rama të futen në betejë nën flamurin e Berishës për të përçarë PD dhe zgjatur jetën politike të Edi Ramës.

Kemi sakrifikuar shumë për të mos e bërë pis PD-në, për ta mbajtur Partinë Demokratike të pastër nga krimi. S’ka për të ndodhur as tani, as sot dhe as nesër.

Nuk do të ketë Kuvend Kombëtar të PD-së me 11 dhjetor. 11 dhjetorin nuk mund ta shndërrojë dot Sali Berisha, nga dita e lirisë, dita e demokratëve, dita e demokracisë, në ditën e bunkerizimit të PD-së, në ditën e izolimit të PD-së.

Ai dëshiron ta bëjë, sepse vetëm ashtu mendon se i shërben hallit të tij. Por detyra jonë është t’i shërbëjmë hallit të demokratëve dhe jo hallit të Sali Berishës.

Partia Demokratike e Shqipërisë do të përqëndrohet tek ajo që kemi marrë përsipër: ti prijmë demokratët drejt qeverisjes së vendit, të mundim të vetmin kundështar që kemi Edi Ramën dhe të krijojmë një të ardhme për shqiptarët.

Për këtë arsye, për ti shërbyer demokratëve dhe jo hallit të Sali Berishës, i propozoj Kryesisë  ë Partisë Demokratike: Thirjen e Kuvendit Kombëtar me 18 dhjetor”.

Ky hap pritet të tensionojë edhe më tepër PD-në, pasi është një tentativë e Bashës për të matur muskujt me Berishën, duke i faturuar këtij të fundit dhe akuza tipike berishiste në lloj. /tesheshi.com/