Nga Ylli Pata
Pas kaq kohësh, rikthehet në skenën politike shqiptare personazhi Audrey Glover, e njohur si gruaja “halë në sy” e ish-liderit demokrat Sali Berisha.
Ka qenë vetë ky i fundit që e ka “ringjallur politikisht” diplomaten britanike duke e quajtur atë një kapomafie ndërkombëtare të votës, pra një pjesëtare të trupit diplomatik të Madhërisë së Saj, Mbretëreshës Elisabetë të Britanisë së Madhe.
“Unë kam denoncuar Glover si kapomafie ndërkombëtare të votës, dhe nuk ka njeri që s’ja faktoj, cilido që më kundërshton le të vijë të ulet me mua. S’do ta sulmoja kurrë një ish-diplomate me këto fjalë, por e sulmoj sepse nuk mund të ndodhi kurrë që i njëjti ndërkombëtar të vijë tre here kryesuese e monitorimit të zgjedhjeve në Shqipëri me historitë e veta konkrete. Ndaj dhe unë e them këtë se ndaj zotit ambasador shpreh shumë keqardhje për qëndrimin e tij ndaj zgjedhjeve”, tha ish-kryeministri gjatë një bisede me gazetarë në zyrën e tij.
Por kur dhe si nisi kjo urretje që nuk pati në asnjë moment “dashuri” mes dy figurave?
Në maj të vitit 1996, diplomatja britanike u emërua nga OSBE-ODIHR-i si kryesuese e misionit vëzhgues të zgjedhjeve parlamentare në Shqipëri.
Dhe në fund ajo firmosi një raport që i cilësonte zgjedhjet, pra ato të përgjithshmet e 26 majit, si “jo të lira dhe të ndershme”.
Berisha e urreu aq shumë sa disa muaj më pas i kërkoi hapur Këshillit të Europës se nuk e donte ODIHR-in si vëzhgues të zgjedhjet. Por kjo organizatë kontrollohet nga amerikanët, të cilët në këtë rast e cilësuan presidentin e asaj kohe si “jo demokratik”.
Berisha u largua nga Presidenca, qëndroi 8 vjet në opozitë dhe më pas në vitin 2005 u rikthye në pushtet duke u bërë kryeministër.
Në zgjedhjet e vitit 2009, pra 4 vjet më pas, OSBE i propozon Berishës si kryetar të misionit vëzhgues të OSBE-ODIHR-it, Daan Everts, ish-kreun e prezencës së OSBE-së në vitet 1997-98, por Berisha e refuzoi kategorikisht, pasi qeveritë e kanë këtë të drejtë.
Por amerikanët që kontrollojnë OSBE-në i dërgojnë një “vechia conoschienza”, as më pak e as më shumë por kryevëzhguesen e vitit 1996, Audrey Glover, pikërisht atë që Berisha kurrë nuk do ta donte.
Gjithsesi, Berisha ishte aq i fuqishëm sa për të gjetur marifete që ta anashkalonin diplomaten britanike. Ai arriti ta margjinalizonte duke e dubluar me mikun e tij austriak, Grosruck, i cili solli për zgjedhjet misionin e Asamblesë Parlamentare të OSBE-së, duke e kthyer Gloverin në thjesht një tekniciene.
Por nuk kaluan as 6 vjet, kur amerikanët dhe vendet e BE e sollën sërish në Shqipëri britaniken e fortë, Audrey-n e urryer.
Dhe nuk kanë kaluar vetëm pak muaj që ajo të marrë damkën si kapomafie të votës. Po pse?! Sepse ajo gjatë mbledhjes së krerëve të shteteve të BE-së është thirrur për të dhënë verdiktin e zgjedhjeve të 21 qershorit dhe ka thënë: të lira, vetëm Berisha dhe Ilir Meta janë trukues…
/tesheshi.com/
