Berisha, sulm investimit më të madh amerikan në Shqipëri

Berisha sulmoi nga Dibra investimin më të madh amerikan të momentit në Shqipëri: Hidrocentralin e Skavicës, një vepër e planifikuar që në kohën e komunizmit nga ikonat e hidroenergjtikës shqiptare.

I fundit që e vlerësoi pak ditë më parë qe inxhinier Bardhyl Reso, një ndër themeluesit e PD-së, prej vitesh në SHBA, duke e cilësuar një vepër gjigande dhe të domosdoshme.

Por Berisha s’mendon kështu, politikisht kuptohet, jo teknokratikisht.

Duke prezantuar  Premtim Kryemadhin si kandidatin e koalicioni “Shtëpia e Lirisë” për kryetarin e Bashkisë së Dibrës, ai iu qas Skavicës nga një tjetër këndpamje.

“Dibra vendos që të mos përmbysë toka e saj me hidrocentralet të varrosë historinë e madhe të Dibrës. Nuk mund të ndodhë që të përmbytet Dibra, nuk mund të ndodhë kurrë”, tha Berisha, që sipas kësaj logjike duhet të kundërshtojë dhe ndërtimin e hidrocentraleve të Fierzës a Komanit, kaluar nga përmbytje fshatrash, ku i pari madje përmbyti Kukësin e vjetër. Sigurisht, jo si fatkeqësi por si planifikim.

“Unë nuk jamë kundër ndërtimit të hidrocentraleve, por jam kundër përmbytjes së fshatrave. Është e vërtetë se diga e madhe bëhet rregullatore e prodhimi i energjisë më i madh, por është  e vërtetë se përmbytja e fshatrave është e madhe. Ka burime të tjera solare”, tha Berisha, duke tentuar të bëjë ekspertin. Por siç është thënë, Skavica nuk është thjesht për prodhim energjie por vlen si rregullator i prurjeve të Drinit, duke eliminuar çdo përmbytje nga Drini me hapje të detyruar portash, siç ka ndodhur shpesh, ku e ka pësuar sidomos Shkodra. /tesheshi.com/