Ish-kreu demokrat Berisha ka publikuar një foto, shoqëruar më statusin respektiv: “Ja kushtet çnjerezore, menca e batalionit prej 350 gardistesh qe ruajne Sarajet ultra luksoze te Norieges ne Surrel! Sb”. Pra, sipas Berishës, këta në foto janë efektivë garde që ruajnë shtëpinë e Ramës.
Por ka reaguar menjëherë Garda e Republikës, ku me anë të një deklarate hedh poshtë gjithçka është shkruar nga njeriu që deri dje ishte kryeministër i vendit, më herët edhe president.
“Sqarojmë opinionin publik dhe vetë shkelqësinë e tij, zotin Sali Berisha, se fotoja e propaganduar sot prej tij në Kuvendin e Shqipërisë, si pjesë e veprimtarisë së Gardës së Republikës, nuk ka asnjë lidhje me Gardën e Republikës dhe as me zonën e banimit e kryeministrit aktual të Shqipërisë. Po ashtu personat në foto nuk janë punonjës të Gardës së Republikës”.
“Në bazë të verifikimeve të bëra prej institucionit tonë, rezulton se jo vetëm kjo foto nuk ka lidhje me Gardën e Republikës, po nuk ka lidhje as me Shqipërinë. Fotoja është bërë në një province të Italisë dhe institucioni ynë disponon edhe gjeneralitetet e personave në foto, të cilët janë emigrantë shqiptarë në Itali“, thuhet në deklaratë.
Aty i kërkohet Berishës që të mos e përfshirë Gardën në vorbullën e luftës politike, duke thënë se “mbetemi në dispozicion të zotërisë së tij për çdo verifikim”. /tesheshi.com/
