Shqipëria dhe Kosova kanë shumë çështje për të zgjidhur, një ndër to është edhe ajo e shtetësisë. Të gjitha vendet e Ballkanit prej shumë vitesh kanë zgjidhur këtë problem, përveç Shqipërisë, e cila duket se ka mbetur peng i fobive të të tjerëve ndaj shqiptarëve.
Kështu u shpreh ish-kryeministri Sali Berisha gjatë takimit me zv.kryeministrin e Parë dhe kreun e diplomacisë së Kosovë, Behgjet Pacolli.
Berisha vlerësoi se marrëveshjet e Brukselit janë të një rëndësie jetike për shqiptarët dhe se është e nevojshme që marrëdhëniet mes dy vendeve tona të jenë përparësi madhore për qeveritë, në mënyrë që potenciali kombëtar të shpaloset dhe zhvillohet më tej.
Gjatë takimit, Berisha theksoi se përparësi me të madhe duhet të marrë hekurudha Milot – Prizren, e cila është jetike për Kosovën por dhe për rajonin në tërësi.
“Ndërtimi hekurudhës do të plotësonte korridorin më fizibël të rajonit dhe natyrisht kjo edhe për Shqipërinë dhe për Kosovën do kishte një interes të jashtëzakonshëm. Së bashku me autostradën, hekurudha e bën Kosovën vend me porte të vetat.
Duhet të punohet në mënyrë që hiqen barrierat midis dy vendeve dhe kufiri të jetë thjesht administrativ. Gjërat kombëtare e kanë fizibilitetin më të lartë se çdo gjë tjetër, doganat duhet të jenë vetëm në kufijtë e jashtëm të dy vendeve dhe jo midis dy vendeve”, tha Berisha. /tesheshi.com/
