Ish-kryeministri Sali Berisha foli në mbledhjen e grupit parlamentar të partisë Demokratike, mbajtur edhe këtë të enjte në çadrën e ngritur nga opozita përpara Kryeministrisë. Në mesazhet e tij, ai iu drejtua kryeministrit Rama me këshillën për të dhënë dorëheqjen e për t’i hapur rrugën qeverisë teknike që do të bashkonte edhe opozitën në zgjedhjet e 18 qershorit.
Sipas Berishës, Edi Rama nuk mund ta çojë dot vendin në zgjedhje pa opozitën dhe aletatët, që siç tha, e kanë braktisur.
“Ata që vijnë tek ti dhe të thonë do të qëndrojmë vetëm ata kanë hall të vjedhin. Ta dish mirë, Shqipërinë vetëm në zgjedhje nuk e çon dot. Mund ta çosh veten ti në çdo drejtim tjetër por jo Shqipërinë vetëm në zgjedhje”, tha Berisha, duke paralajmëruar Ramën të mos e nxehë revolucionin. “Shko tani, jep dorëheqjen dhe të bëjmë zgjidhjen e qytetëruar siç u ka hije shqiptarëve. Ke tejkaluar çdo vijë të kuqe, çdo moral, ik shporru, largohu!”, apeloi ai.
Berisha argumentoi në çadrën e protestës edhe pse opozita nuk pranon të shkojë në zgjedhje me Edi Ramën kryeministër, por vetëm me qeveri teknike, duke sjellë në vëmendje akuzat për mbështetje të kultivimit të drogës e krimit.
Ish-kryeministri tha se policia ka qenë institucioni që ka respektuar më shumë. “Por si mund ti besoj asaj policie që e veshi vendin me vellon e zezë të drogës. Atë polici e ke shkatërruar. Iku ministri, vodhi hajduti bashkë me Çipën 28 dokumenta kryesore të krimit. Pse shkoi Xhafa, xhelati i diktaturës, pikërisht për të fshirë këto. Por mund të lëmë ne? Jo”, u shpreh Berisha. /tesheshi.com/
