Ish-kryeministri Sali Berisha u bëri thirrje banorëve të kryeqytetit të presin të rinjtë që do të vërshojnë, sipas tij, të shtunën e 13 majit për të marrë pjesë në protestën e opozitës. Ndërsa sot ka munguar kreu demokrat, Lulzim Basha, në çadrën në bulevard nuk kanë munguar fjalimet. Berisha parashtroi madje, edhe një skenar sipas të cilit, nga tmerri i protestës, Edi Rama ka urdhëruar zyrtarët e shkollave të organizojnë pikniqe me të rinjtë për ditën e shtunë.
“Më 13 maj në Tiranë vërshon mbarë Shqipëria”, deklaroi Berisha.
Duke e quajtur “varrmihës të pluralizmit politik” Berisha i bëri thirrje Ramës të heqë dorë pasi çadra e opozitës është mal që ai s’e kapërcen dot. “Të garantoj se protetën e ke paqësore, Edvin. Çadra do të duket Everest dhe atëherë do shikosh, do tmerrohesh, ne jemi të vendosur në protestë paqësore. I bëj thirrje të gjithëve nga Shqipëria, Kosova, Maqedonia, Mali i Zi, diaspora të gjithë në Tiranë në protestën madhështore për mbrojtje të pluralizmit”, tha ai. /tesheshi.com/
