Enkelejd Alibeaj, një ndër kritikët më të fortë të frymës foltoriste në PD, apo dhe vetë Berishës, madje duke kujtuar dhe të qënit e tij ish-komunist, tha se nuk ka vend më për t’u diskutuar “non grata” e SHBA për të.
Sipas tij, ajo duhet pranuar siç janë pranuar shumë qëndrime amerikane krah Shqipërisë.
“Këtë vlerësim e ka bërë DASH. Kur e thonë SHBA, kjo është një çështje që çdolloj diskutimi për të shkuar më tej është e tepërt.
Përgjigja që i ka hije një politikani shqiptar, sidomos të atyre që përfaqësojnë PD-në, të cilët i kanë pranuar SHBA-të ashtu siç janë; siç i pranuam në vitin 1992 kur erdhën në krahun tonë me Sali Berishën, siç i pranuam në 1999, atëherë kur e gjithë bota ishte skeptike ndaj gjenocidit serb, ndaj shqiptarëve të Kosovës dhe ishin ata që vendosën veton, siç i pranuam në vitin 2007 kur erdhën dhe thanë: Kosova, shtet i pavarur; ashtu do të duhet t’i pranojmë edhe tani për vendime siç ndodhi edhe me rastin e zotit Berisha”, tha Alibeaj në A2 CNN.
Sipas tij, kjo është dhe çështje morali politik
“Nëse ne kemi kërkuar për të gjithë ata që janë shpallur non grata të largohen nga parlamenti, por edhe nga politika, hije na ka të gjithëve për koherencë dhe për moralitet në politikë, të mbajmë të njëjtin qëndrim edhe ndaj Berishës”, tha Alibeaj. /tesheshi.com/
