Qeveria shqiptare po shmang projektet kryesore në samitin e Vjenës duke dërguar aty ato që nuk kanë as studim fizibiliteti. Ish-kryeministri Berisha ka reaguar ndaj faktit që pala shqiptare pritet të mos e diskutojë në samitin e Vjenës lidhjen hekurudhore me Kosovën, edhe pse një projekt i promovuar mjaft nga Tirana dhe Prishtina.
Ish-kryeministri renditi projekt kryesor hekurudhën Milot-Prizren, gjatë një bashkëbisedimi me gazetarët.
“Unë dua të them këtu se projekti i të gjitha projekteve rajonale për Shqipërinë, Kosovën dhe më tutje është hekurudha Tiranë- Prishtinë, apo më thjeshtë Milot-Prizren. Është kjo hekurudhë që bën që Shqipëria të përfitojë në shkallë maksimale nga pozicioni i saj strategjik”, tha Berisha.
Berisha ka vlerësuar samitin e Vjenës, në vijimësi të nismës së Berlinit si një përgjigje serioze ndaj mungesës së një projekti të vetëm rajonal europian që karakterizon Ballkanin, sipas tij, edhe pas 20 vjetësh nga dalja prej diktaturave.
“Ky rajon që u karakterizua nga konfliktet, trashëgoi prapambetjetn e diktaturave dhe pas 20 vitesh nuk kanë një projekt të vetën rajonal europian. Pikërisht kësaj mungese i jep përgjigje më serioze nisma e Berlinit, samiti i Vjenës dhe samitet e tjera që do vazhdojnë”, tha ish-kryeministri. /tesheshi.com/
